പെരുംകളിയാട്ടം

പുലിമറഞ്ഞ തൊണ്ടച്ചന്‍ ഭാഗം 2

2008-09-29T08:56:00.000-07:00

പുലിമറഞ്ഞ തൊണ്ടച്ചന്‍ ഭാഗം 1 ഇവിടെ വായിക്കാം.

അള്ളടം നാട്ടിലേക്ക് പോകേണ്ടെന്ന് വാശി പിടിച്ച ഭാര്യയോട് നാടിന്റെയും ജന്മിയുടെയും അഭിമാനം കാക്കാന്‍ കിട്ടിയ അവസരം ഉപയോഗിച്ചേ പറ്റു എന്ന് പറഞ്ഞു ബോധ്യപ്പെടുത്തി. പുലിമറയല്‍ വിദ്യ പ്രയോഗിച്ചാല്‍ തിരിച്ചു മനുഷ്യനാകാന്‍ വളരെ ശ്രദ്ധയോടെ കാര്യങ്ങള്‍ ചെയ്യേണ്ടതുണ്ട്. ഏറ്റവും വിശ്വസ്തരായ ആളുകള്‍ തന്നെ വേണം അതു ചെയ്യാന്‍. അക്കാര്യം കാരി ഭാര്യയെ തന്നെ ഏല്പിച്ചു. പുലിരൂപം ധരിച്ചു താന്‍ വീട്ടിലെത്തിയാല്‍ ഒരു പാത്രത്തില്‍ അരികഴുകിയ വെള്ളം പുലിയുടെ മേല്‍ ഒഴിക്കണം, ചാണകത്തില്‍ മുക്കിയ ‘മാച്ചി’ കൊണ്ട് ദേഹത്ത് അടിക്കണം. നിങ്ങടെ വെള്ളച്ചിയല്ലേ എന്നും, വയറു തൊട്ട് നിങ്ങളുടെ കരുവല്ലെ ഇത് എന്നും പറയണം. ഇത്രയും ചെയ്താല്‍ മാത്രമേ പുലിത്തെറം ശമിക്കൂ. ഇതൊക്കെ ചെയ്തു കഴിഞ്ഞാല്‍ മാത്രമേ മനുഷ്യനാകൂ. ഇക്കാര്യം വളരെ രഹസ്യമായി സൂക്ഷിക്കണം, മാത്രവുമല്ല ഇതു ചെയ്യുമ്പോള്‍ ആരും കാണുവാനും പാടില്ല. വെള്ളച്ചി എല്ലാം സമ്മതിച്ചു.

അള്ളടം നാട്ടിലേക്ക് പുറപ്പെട്ട കാരി ഗുരുക്കള്‍ക്കും സംഘത്തിനും വഴി നിറയെ പരിഹാസ വചനങ്ങള്‍ കേള്‍ക്കേണ്ടി വന്നു. പ്രശസ്തരായ മാന്ത്രികര്‍ക്കും വൈദ്യന്മാര്‍ക്കും സാധിക്കാത്ത കാര്യമാണോ ഒരു പുലയന്‍ ചെയ്യാന്‍ പോകുന്നത്??

“മലനാട്ടില്‍ മഞ്ഞയില്ലാഞ്ഞിട്ടോ
ഇന്നാട്ടില്‍ കൂവ വരുത്തുന്നത്”
എന്ന മട്ടില്‍ മേല്‍ ജാതിക്കാര്‍ പരിഹാസം ചൊരിഞ്ഞു.

കോവിലകത്തെത്തിയ കാരി തന്റെ മാന്ത്രിക വിദ്യയിലൂടെ തമ്പുരാന്റെ രോഗം മനസ്സിലാക്കി ബാധോച്ചാടനം നടത്തി രോഗം ഭേദമാക്കി. അസുഖം ഭേദമായപ്പോള്‍ തമ്പുരാന് കാരിയുടെ ഒടിമറയല്‍ അഥവാ പുലിമറയല്‍ വിദ്യ കാണണം. വളരെ കരുതലോടെ ചെയ്യേണ്ട വിദ്യയാണത്. എന്തെങ്കിലും തെറ്റു സംഭവിച്ചാല്‍ തിരിച്ചു മനുഷ്യരൂപത്തിലേക്ക് വരിക അസാധ്യം. എങ്കിലും കാരി ധൈര്യപൂര്‍വ്വം പുലിമറയല്‍ നടത്തി രാജാവിനെ അമ്പരപ്പിച്ചു. തിരികെ മനുഷ്യരൂപം കിട്ടാനായി തന്റെ ചാളയിലേക്ക് പുറപ്പെട്ട കാരി കണ്ടത് അടച്ചിട്ട വാതിലാണ്.

കാരിയെ ചതിക്കാനായി രാജാവിന്റെ ആളുകള്‍ പദ്ധതി തയ്യാറാക്കിയിരുന്നു. രാജഭടന്മാര്‍ വെള്ളച്ചിയോട് പുലിമറയല്‍ നടത്തുന്നില്ലെന്നും വാതിലടച്ചിരിക്കാന്‍ കാരി പറഞ്ഞയച്ചിട്ടുണ്ടെന്നും കള്ളം പറഞ്ഞു. അതു വിശ്വസിച്ച വെള്ളച്ചി വാതിലടച്ച് അകത്തിരിപ്പായി.

പറഞ്ഞതില്‍ നിന്നും വിപരീതമായി ഭാര്യ പ്രവര്‍ത്തിച്ചത് കണ്ട് കലിമൂത്ത പുലി രൂപം പൂണ്ട കാരി വാതില്‍ പൊളിച്ചകത്തു കടന്നു. പുലിയെ കണ്ട് നിലവിളിച്ച വെള്ളച്ചിയെ കലിയടങ്ങാത്ത കാരി കടിച്ചു കീറി വയറ് പൊളിച്ചു. മനുഷ്യരൂപം തിരിച്ചു ലഭിക്കാതെ കാരി പുലിയന്നൂര്‍ മലയിലേക്ക് മറഞ്ഞു.

അല്പകാലത്തിനകം തന്നെ അള്ളട രാജാവ് വീണ്ടും രോഗബാധിതനായി. ദേവപ്രശ്നത്തില്‍ പുലി മറഞ്ഞ കാരി ഗുരുക്കളുടെ കോപം മൂലമാണ് രാജാവ് രോഗബാധിതനായതെന്ന് വെളിപ്പെട്ടു. രോഗശാന്തി വേണമെങ്കില്‍ കാരി ഗുരുക്കളെ കെട്ടിയാടിക്കണമെന്നും ബോധ്യപ്പെട്ടു. അങ്ങിനെ മാടായി കാരി ഗുരുക്കള്‍ക്ക് തെയ്യക്കോലം കല്‍പ്പിക്കുകയും പുലിമറഞ്ഞ തൊണ്ടച്ചനായി തെയ്യം കെട്ടിയാടിച്ച് ആരാധിക്കുകയും ചെയ്തു.

പുലയ സമുദായത്തില്‍ പെട്ട ആളുകളാണ് പുലി മറഞ്ഞ തൊണ്ടച്ചന്‍ തെയ്യം കെട്ടിയാടി വരുന്നത്.

* ‘മാച്ചി’ - ചൂല്
അവലംബം: കളിയാട്ടം, സി.എം.എസ്. ചന്തേര

പുലിമറഞ്ഞ തൊണ്ടച്ചന്‍ ഭാഗം 1

2008-09-28T10:37:00.000-07:00

പൊലികാ പൊലികാ പൊലികാ
പുലിമറഞ്ഞ തൊണ്ടച്ചന്‍ തെയ്യം പൊലികാ
പുകള്‍പെറും മാടായി കാരിഗുരുക്കളേ
പുലിമറഞ്ഞ തൊണ്ടച്ചാ, നീ തൊണയേ..

ഇതു പുലിമറഞ്ഞ തൊണ്ടച്ചന്റെ പൊലിപ്പാട്ട്. വടക്കെമലബാറില്‍ വളരെ പ്രശസ്തമായ ഒരു പുരാവൃത്തമാണ് മാടായി കാരിഗുരുക്കളുടേത്. പുലയനായി ജനിച്ച് പതിനെട്ടു കളരിയിലും അഭ്യാസം പൂര്‍ത്തിയാക്കി ഒടുവില്‍ തമ്പുരാക്കന്മാരുടെ ചതിയില്‍‌പെട്ട് സ്വജീവന്‍ വെടിയേണ്ടി വന്നു മാടായി കാരി ഗുരുക്കള്‍ക്ക്. പ്രശസ്ത കഥാകൃത്തായ എന്‍ പ്രഭാകരന്റെ പുലിജന്മം എന്ന നാടകം, അന്തരിച്ച പ്രഗത്ഭ എഴുത്തുകാരന്‍ ഡോ.ടി.പി.സുകുമാരന്റെ മാടായി കാരി എന്ന നാടകം, താഹ മാടായിയുടെ ‘കാരി’, ഒടുവില്‍ പ്രിയനന്ദനനെ ദേശീയ പുരസ്കാരത്തിനര്‍ഹനാക്കിയ പുലിജന്മം എന്ന സിനിമ, ഇവയെല്ലാം മാടായി കാരി ഗുരുക്കളുടെ കഥയെ പുനരാഖ്യാനം ചെയ്തുകൊണ്ടാണെഴുതപ്പെട്ടിട്ടുള്ളത്. എല്ലാവരും വ്യത്യസ്ത വീക്ഷണ കോണുകളിലൂടെ കാരിയുടെ കഥ പറയുന്നു.

ചേണിച്ചേരി കുഞ്ഞമ്പു എന്ന നാട്ടുപ്രഭുവിന്റെ അടിമകളായിരുന്ന വിരുന്തന്റെയും വിരുന്തിയുടെയും മകനായിരുന്നു കാരി. കുഞ്ഞിമംഗലത്തിനു കിഴക്ക് വടക്ക് ഭാഗത്തുള്ള പാറന്താട്ട് മലയിലാണ് ഇവര്‍ താമസം. ചെറുപ്പം മുതല്‍ക്കു തന്നെ കൃഷിപ്പണിയോട് കാരിക്ക് താല്‍പ്പര്യമില്ലായിരുന്നു. കൈമിടുക്കും മെയ്ക്കരുത്തുമുള്ള കാരിക്ക കളരിയില്‍ ചേരാനായിരുന്നു ആഗ്രഹം. അടിമകളായ പുലയര്‍ക്ക് കളരികളില്‍ പ്രവേശനമില്ലായിരുന്നു അക്കാലത്ത്. കാരിയുടെ ആഗ്രഹം കേട്ട് ജന്മിയായ ചേണിച്ചേരി അവനെ കളരിയില്‍ ചേര്‍ക്കാന്‍ തീരുമാനിച്ചു. അവന്റെ പേരും കുലപ്പേരും മാറ്റിപ്പറഞ്ഞാണ് ചേണിച്ചേരി അവന് കളരി പ്രവേശനം ഉറപ്പാക്കിയത്.

അക്കാലത്ത് പ്രശസ്തമായ 18 കളരികളായിരുന്നു ഉണ്ടായിരുന്നത്. അതില്‍ 17 കളരികളിലും ‘കാരി’ പയറ്റി തന്റെ പ്രാഗത്ഭ്യം തെളിയിച്ചു. പതിനെട്ടാമത്തെ കളരിയായ ചോദിയാര്‍ കളരിയില്‍ നിന്നും മാന്ത്രിക വിദ്യകളും ജ്യോതിഷവും ഹൃദിസ്ഥമാക്കി. അതീവ ജാഗ്രതയോടെ പഠിക്കേണ്ട ‘പുലിമറയല്‍‘ എന്ന ഒടിവിദ്യയും കാര്യ പഠിച്ചെടുത്തു. വിദ്യാഭ്യാസം പൂര്‍ത്തിയാക്കി പതിനെട്ടാമത്തെ കളരിയിലെ ആശാത്തിയോട് യാത്രപറയാന്‍ തുടങ്ങുമ്പോഴേക്കും, കാരി പേരും കുലപ്പേരും മാറ്റി പറഞ്ഞതാണെന്നു മനസ്സിലായി. കുപിതയായ ആശാത്തി ഗുരുവിനെ ചതിച്ചു (പേരും കുലപ്പേരും മാറ്റിപ്പറഞ്ഞത്) വശത്താക്കിയ വിദ്യകൊണ്ടു തന്നെ കാരി നശിച്ചു പോകുമെന്ന് ശപിച്ചു. ദുഖിതനായ കാരി സ്വഗൃഹത്തില്‍ തിരച്ചെത്തി. ആര്‍ജ്ജിച്ച വിദ്യ മറ്റുള്ളവര്‍ക്ക് പകര്‍ന്ന് കൊടുക്കണമെന്ന തന്റെ ആഗ്രഹം ജന്മിയായ ചേണിച്ചേരിയെ അറിയിച്ചു.കാരി അഭ്യസിച്ച വിദ്യകള്‍ ചേണിച്ചേരി മുമ്പാകെ കാണിച്ചു കൊടുത്തു. സന്തുഷ്ടനായ ജന്മി മലയില്‍ തന്നെ ഒരു കളരി നിര്‍മ്മിച്ചു കൊടുത്തു.

കളരി തുടങ്ങിയതോടു കൂടി അഭ്യാസിയായ ‘കാരി’ ഗുരുക്കളുടെ പ്രശസ്തി നാടെമ്പാടും പരന്നു. കോലത്തു നാട്ടില്‍ മാത്രമല്ല അള്ളടത്തു നാട്ടില്‍ വരെ പ്രശസ്തിയെത്തി. ആ സമയത്താണ് അള്ളടം നാട്ടിലെ രാജാവിന് (നീലേശ്വരം) മാനസിക വിഭ്രാന്തി പിടിപെട്ടത്. സഹോദരിയുടെ പുത്രനായ ഇളമുറ തമ്പുരാന്‍ പൊട്ടന്‍‌, ഗുളികന്‍‌‌‌, കുറത്തി തുടങ്ങിയ മൂര്‍ത്തികളെ ഉപാസിച്ച് അവരെകൊണ്ട് വിഭ്രാന്തി വരുത്തിച്ചതാണെന്നായിരുന്നു കേള്‍വി. രോഗം മാറ്റുവാന്‍ പ്രശസ്തരായ വൈദ്യന്മാരൊക്കെ ശ്രമിച്ചുവെങ്കിലും പരാജയമായിരുന്നു ഫലം.‘മാടായി കാരി ഗുരുക്കളുടെ’ പ്രശസ്തി കേട്ടറിഞ്ഞ് കൊട്ടാരത്തില്‍ നിന്നും ആളെത്തി. ‘കാരിയെ’ പറഞ്ഞയക്കാന്‍ ചേണിച്ചേരി ജന്മി ആദ്യം വിസമ്മതിച്ചു. കാരിയെ അയക്കില്ലെന്നറിഞ്ഞ് കൊട്ടാരത്തില്‍ നിന്നും ഭീഷണിയായി. ഒടുവില്‍ കാരിയെ മനസ്സില്ലാമനസ്സോടെ അയക്കുവാന്‍ തന്നെ തീരുമാനിച്ചു. അഭ്യാസിയായ കാരിയെ അള്ളടത്തേക്കയച്ചാല്‍ കാര്യസാധ്യത്തിനുശേഷം ചതിക്കുമെന്ന് ഭയപ്പെട്ടതുകൊണ്ടായിരുന്നു ആദ്യം അയക്കാന്‍ മടിച്ചത്. പുലയനായ കാരിയോടു അസൂയയുള്ളവര്‍ കോലത്തു നാട്ടിലും, അള്ളടത്തും ധാരളമുണ്ടെന്ന് ജന്മിക്കറിയാമായിരുന്നു. അവര്‍ അപായപ്പെടുത്തുമെന്ന് മനസ്സിലാക്കിയ ജന്മി “ചരതിക്കണം, തടി ചരതിക്കണം” എന്ന് പലവട്ടം ഓര്‍മ്മിപ്പിച്ചാണ് കാരിയെ യാത്രയാക്കിയത്.

ബാക്കി ഇവിടെ വായിക്കുക

* ചരതിക്കണം - ശ്രദ്ധിക്കണം

കോതാമ്മൂരിയാട്ടം

2008-06-11T19:20:00.001-07:00

അത്യുത്തരകേരളത്തില്‍ പ്രത്യേകിച്ചും കോലത്തുനാട്ടില്‍ നിലനിന്നിരുന്ന ഒരനുഷ്ഠാനകലയാണ് കോതാമ്മൂരിയാട്ടം അഥവാ കോതാരിയാട്ടം. ഉര്‍വരതാനുഷ്ഠാനങ്ങളുമായി ഏറെ അടുത്തു നില്‍ക്കുന്ന കോതാമ്മൂരി ഒരു “വീടോടി“ കലാരൂപമാണ്. ഗ്രാമത്തിലെ പ്രധാന ക്ഷേത്രത്തില്‍ നിന്നും ആരംഭിക്കുന്ന കോതാമ്മൂരി ആ പ്രദേശത്തെ വീടുകളിലെല്ലാം പോവുകയും അവിടെ കോതാമ്മൂരിയാട്ടം നടത്തുകയും പതിവാണ്. നാശോന്മുഖമായിക്കൊണ്ടിരിക്കുന്ന നാടന്‍ കലാരൂപങ്ങളിലൊന്നാണിത്.

തുലാ മാസം 10ആം തീയതിയാണ് കോതാമ്മൂരിയാട്ടം ആരംഭിക്കുക. ഒരു സംഘത്തില്‍ ഒരു കോതാമ്മൂരി തെയ്യവും (ആൺ‌കുട്ടികളാണ് ഈ തെയ്യം കെട്ടുക) കൂടെ രണ്ട്
മാരിപ്പനിയന്മാരുമുണ്ടാകും. ചില സംഘങ്ങളില്‍ 4 പനിയന്മാരും ഉണ്ടാകാറുണ്ട്. കോതാമ്മൂരി തെയ്യത്തിനു അരയില്‍ ഗോമുഖം കെട്ടിവച്ചിട്ടുണ്ടാകും. സാധാരണ തെയ്യങ്ങള്‍ക്കുള്ളതു പോലെ മുഖത്തെഴുത്തും ചമയങ്ങളും ഈ തെയ്യത്തിനുമുണ്ടാകും. പനിയന്മാന്‍ക്ക് മുഖപ്പാളയും, അരയില്‍ കുരുത്തോലയും, പൊയ്ക്കാതുകളും ഉണ്ടാകും. ഇവരെ കൂടാതെ വാദ്യസംഘവും, പാട്ടുപാടുന്നതില്‍ നയിക്കുന്നതിനായി സ്ത്രീകളും ഇവരുടെ കൂടെയുണ്ടാകും. ഓരോ വീട്ടിലും ഈ സംഘം ചെല്ലുകയും കോതാമ്മൂരിയാട്ടം നടത്തുകയും ചെയ്യും. ചിലയിടങ്ങളില്‍ ഗോക്കളെക്കുറിച്ചുള്ള പാട്ടുപാടി ആല (കാലിത്തൊഴുത്ത്)യ്ക്കും ചുറ്റും കോതാമ്മൂരിയാട്ടം നടത്താറുണ്ട്. അരമണിക്കൂറിലധികം ഓരോ വീട്ടിലും കോതാമ്മൂരിയാട്ടത്തിനു ചെലവഴിക്കേണ്ടി വരുന്നത് കൊണ്ട് ഗ്രാമത്തിലെ വീടുകളിലെല്ലാം കയറിയിറങ്ങാന്‍ 10 മുതല്‍ 15 ദിവസം വരെ എടുക്കാറുണ്ട്.

കോതാമ്മൂരി വരുമ്പോള്‍ വീടുകളില്‍ സ്വീകരിക്കുന്നതിനായി വിളക്കും തളികയും, നിറനാഴിയും, മുറത്തില്‍ നെല്‍‌വിത്തും ഒരുക്കി വെക്കും. വീട്ടില്‍ എത്തിയ ഉടന്‍ തന്നെ കോതാമ്മൂരിയും, പനിയന്മാരും ഇതിനു വലംവെക്കും. തുടര്‍ന്ന് പാട്ടുകള്‍ പാടും. മുഖമായി ചെറുകുന്നിലമ്മയുടെ ചരിതം കോതാമ്മൂരി പാട്ടിലെ പ്രധാന പാട്ടാണ്. “ആരിയന്‍ നാട്ടില്‍ പിറന്നോരമ്മകോലത്ത് നാട് കിനാക്കണ്ടിന്“ എന്നു തുടങ്ങി ചെറുകുന്നത്തമ്മയുടെ കഥ പറയുന്നതാണീ പാട്ട്. ചെറുകുന്നിലമ്മ കൃഷിയുമായി വളരെ ബന്ധമുള്ളൊരു ഗ്രാമീണദേവതയായാണ് കണക്കിലാക്കപ്പെടുന്നത്. കോലത്തിരിമാരുടെ കുലദേവതയുമാണ്. പാപ്പിനിശ്ശേരി മുതല്‍ ചെറുകുന്ന് വരെ നീണ്ടു കിടക്കുന്ന “കോലത്തുവയല്‍” ഈ അമ്മയുടേതാണ്.

ഈ പാട്ടുകള്‍ കൂടാതെ മാടായിക്കാവിലമ്മയുടെയും, തളിപ്പറമ്പത്തപ്പനെയും കുറിച്ചുള്ള പാട്ടുകളും, വിത്തു പൊലിപ്പാട്ട്, കലശം പൊലിപ്പാട്ട് എന്നിവയും പാടും. വിവിധ വിത്തിനങ്ങളുടെ പേരു പറഞ്ഞു ആ വിത്തെല്ലാം ‘നിറഞ്ഞു പൊലിഞ്ഞു വരേണ’മെന്നാണ് ഈ പാട്ടുകളിലുള്ളത്.

എന്തെല്ലാം നെല്ല് പൊലിക,
ചെന്നെല്ല് വിത്ത് പൊലിക പൊലി എന്നു തുടങ്ങി
പതിനെട്ടു വിത്തുമേ പാടിപ്പൊലിപ്പാന്‍
ഭൂമിലോകത്തിതാ കീഞ്ഞേന്‍
ആലവതുക്കലും വന്നാ
ഗോദാവരിയെന്ന പശുവോ എന്നാണ് പൊലിപ്പാട്ടിലുള്ളത്.

മദ്യമെടുക്കുന്നതിന്റെ വിശദാംശങ്ങളെ വര്‍ണ്ണിക്കുന്ന പാട്ടാണ് കലശം‌ പൊലിപ്പാട്ട്. കലശം(മദ്യം) മനുഷ്യര്‍ക്കും ദേവതകള്‍ക്കും ഒരുപോലെ പ്രിയപ്പെട്ടതു തന്നെ.

കളിയാടോന്‍ കളിയാടോന്‍ കളിയാടോന്‍ കല്ലേകളിയാടോന്‍

കല്ലിന്റെ കീഴ ചുമട്ടില്‍ എന്നു തുടങ്ങി

ആര്‍ക്കെല്ലാം വേണം

കലശം തൊണ്ടച്ചന്‍ ദൈവത്തിന്നും വേണം

കലശം മുത്തപ്പന്‍ ദൈവത്തിനും വേണം

കലശം പൊട്ടന്‍ ദൈവത്തിനും വേണം

കലശം നാടും പൊലിക നഗരം പൊലിക

കള്ളും പൊലിക കലശം പൊലിക എന്നാണ് ഈ പൊലിപ്പാട്ട് അവസാനിപ്പിക്കുന്നത്.

പൊറാട്ടുനാടകങ്ങളുടെ സ്വഭാവം പ്രകടിപ്പിക്കുന്നൊരു കലാരൂപമാണ് കോതാമ്മൂരി. മുഖപ്പാളകെട്ടിക്കഴിഞ്ഞാല്‍ പനിയന്മാര്‍ക്കെന്തും പറയാം. വേദാന്തം മുതല്‍ അശ്ലീലം വരെ അവര്‍ പറയുകയും ചെയ്യും, പക്ഷെ ഒക്കെയും സാമൂഹ്യ വിമര്‍ശനത്തിനു വേണ്ടിയാണെന്നു മാത്രം. പാട്ടുപാടിക്കഴിഞ്ഞാല്‍ നെല്ലും പണവും തുണിയും ഇവര്‍ക്ക് വീട്ടുകാര്‍ നല്‍കും. കൃഷിയുമായും, കന്നുകാലി വളര്‍ത്തുമായി ബന്ധപ്പെട്ട ഒരു പ്രധാന ആചാരമാണ് കോതാമ്മൂരിയാട്ടം.

കുറച്ചു വര്‍ഷം മുന്‍‌പ് വരെ കോലത്തുനാട്ടിലെ പലഭാഗങ്ങളിലും കോതാമ്മൂരിയാട്ടം നിലനിന്നിരുന്നുവെങ്കിലും ഇന്നെവിടെയും ഈ കലാരൂപം നടത്തുന്നതായി അറിവില്ല. നമ്മുടെ ജീവിതവും, സംസ്കൃതിയുമായി വളരെയധികം ബന്ധപ്പെട്ടതും നാശോന്മുഖമായതുമായ ഇത്തരം കലാരൂപങ്ങള്‍ സംരക്ഷിക്കപ്പെടേണ്ടതാണ്.

കോതാമ്മൂരിയാട്ടത്തെക്കുറിച്ച് മലബാറിയുടെ പോസ്റ്റ് ഇവിടെ വായിക്കാം. (ഈ പോസ്റ്റ് ശ്രദ്ധയില്പെടുത്തിയ മലബാറിക്ക് നന്ദി).

ചിത്രങ്ങള്‍: ധനരാജ് കീഴറ

റഫ: തെയ്യത്തിലെ ജാതി വഴക്കം, ഡോ. സഞ്ജീവന്‍ അഴീക്കോട്

കേരളത്തിന്റെ തനതുകലകള്‍ - കോതാമ്മൂരി, ഡോ.എം.വി.വിഷ്ണു നമ്പൂതിരി

വേട്ടയ്ക്കൊരു മകന്‍

2008-03-12T00:44:00.000-07:00

പുരാണങ്ങളിലെ കഥാപാത്രങ്ങളും ജീവിച്ചിരുന്ന പോരാളികളും ഇഴചേര്‍ന്ന കഥകള്‍ തെയ്യങ്ങളുടെ പുരാവൃത്തങ്ങളില്‍ കാണാം. അത്തൊരുമൊരു ഇതിവൃത്തമാണ് വേട്ടയ്ക്കൊരു മകന്റേത്.

മഹാഭാരത കഥയും, ബാലുശ്ശേരിയിലെ ഒരു നായര്‍ പോരാളിയുടെ കഥയുമാണിവിടെ ഇടകലര്‍ന്നു വരുന്നത്. ഇഷ്ടം വരം നേടാനായി തപസ്സനുഷ്ടിച്ച അര്‍ജുനനെ പരീക്ഷിക്കുന്നതിനായി ശിവ പാര്‍വ്വതിമാര്‍ വേടരൂപം ധരിച്ചു. വേടരൂപം ധരിച്ച പരമശിവന്‍ കാമാര്‍ത്തനായി പാര്‍വതിയെ പ്രാപിക്കുകയും അങ്ങിനെ വേട്ടയ്ക്കൊരുമകന്‍ ജനിക്കുകയും ചെയ്തു. വേട്ടയ്ക്കൊരു മകന്റെ അമിതപ്രഭാവംകണ്ട ദേവകള്‍ ഭയന്ന് വേട്ടയ്ക്കൊരു മകനെ ദേവലോകത്തു നിന്നും ഭൂമിയിലേക്ക് പറഞ്ഞയക്കാന്‍ ആവശ്യപ്പെട്ടതിനാല്‍ , പരമശിവന്‍ അപ്രകാരം ചെയ്തു. അങ്ങിനെയാണ് വേട്ടയ്ക്കൊരുമകന്‍ ഭൂമിയിലെത്തിയതത്രെ.

(വേട്ടയ്ക്കൊരു മകന്റെ തോറ്റം ഇവിടെ കാണാം)

ഭൂമിയിലെത്തിയ വേട്ടയ്ക്കൊരുമകന്‍ പലദിക്കിലും സഞ്ചരിച്ച് കുറുമ്പ്രനാട്ടിലെത്തുകയും ബാലുശ്ശേരിയിലെ പ്രസിദ്ധമായ കാറകൂറ തറവാട്ടിലെ നായര്‍ സ്ത്രീയെ കല്യാണം കഴിച്ച് അവിടെ താമസം തുടങ്ങി. ആ ബന്ധത്തില്‍ അവര്‍ക്കൊരു കുട്ടി ജനിക്കുകയും ചെയ്തു. കാറകൂറ തറവാട്ടുകാരുടെ സ്വന്തമായിരുന്ന ബാലുശ്ശേരിക്കൊട്ട കുറുമ്പ്രാതിരിമാര്‍ അന്യായമായി കൈയ്യടക്കി വച്ചിരുന്നു. പോരാളിയായ വേട്ടയ്ക്കൊരുമകന്‍ ആവശ്യപ്പെട്ടപ്പോള്‍ കുറുമ്പ്രാതിരിമാര്‍ കോട്ട വിട്ടുകൊടുക്കാന്‍ തീരുമാനിച്ചു.

(വേട്ടയ്ക്കൊരു മകന്റെയും ഊര്‍പ്പഴശ്ശിയുടെയും വെള്ളാട്ടങ്ങള്‍ ഇവിടെ കാണാം)

വേട്ടയ്ക്കൊരു മകനെ പരീക്ഷിക്കാന്‍ കുറുമ്പ്രാതിരി നാടുനീളെ നിരവധി തടസ്സങ്ങള്‍ വച്ചിരുന്നു. തന്റെ ഏഴു വയസ്സുമാത്രം പ്രായമുള്ള കുട്ടിയെയും കൂട്ടി എല്ലാ തടസ്സങ്ങളും മാറ്റി കുറുമ്പ്രാതിരിയുടെ മുന്നിലെത്തി. അവിടെ ആയിരക്കണക്കിനു തേങ്ങ കൂട്ടിയിട്ടിരിക്കുകയായിരുന്നു. കുറുമ്പ്രാതിരിയെ അത്ഭുത പരതന്ത്രനാക്കികൊണ്ടു നിമിഷങ്ങള്‍ക്കകം ആ പിഞ്ചു പൈതല്‍ ഉടച്ചു തീര്‍ത്തു.

(വേട്ടയ്ക്കൊരു മകന്റെയും ഊര്‍പ്പഴശ്ശിയുടെയും വെള്ളാട്ടങ്ങള്‍ പ്രതീകാത്മകമായി നാളികേരം തകര്‍ക്കുന്നത് ഇവിടെ കാണാം)

ഇതോടെ കുറുമ്പ്രാതിരിക്ക് വേട്ടയ്ക്കൊരു മകന്റെ ശക്തി ബോധ്യം വരികയും പ്രത്യേക സ്ഥാനം നല്‍കി ആദരിക്കുകയും ചെയ്തു. ഈ സംഭവത്തെ സ്മരിച്ചു കൊണ്ട് വേട്ടയ്ക്കൊരു മകന്റെ വെള്ളാട്ടം നിരവധി നാളികേരം നിരത്തിവച്ച് ഉടയ്ക്കാറുണ്ട്. “നായരായി പുറപ്പെട്ടു, നാളികേരം തകര്‍ത്തു” എന്നാണ് തോറ്റം പാട്ടില്‍ ഇതേ പറ്റി പാടാറുള്ളത്.

വേട്ടയ്ക്കൊരു മകന്‍ നെടിയിരുപ്പു സ്വരൂപത്തില്‍ ക്ഷേത്രപാലന്റെ കൂടെയും, മറ്റിടങ്ങളില്‍ ഊര്‍പ്പഴശ്ശിയുടെയും കൂടെ സഞ്ചരിച്ചു എന്നാണ് വിശ്വാസം. വേട്ടയ്ക്കൊരു മകന്‍ തെയ്യത്തിന്റെ കൂടെ ക്ഷേത്രപാലനും ഊര്‍പ്പഴശ്ശിയും കെട്ടിയാടിക്കാറുണ്ട്.

(വേട്ടയ്ക്കൊരു മകന്‍ തെയ്യം)

നായര്‍ സമുദായക്കാരുടെ പ്രധാന ആരാധനാ മൂര്‍ത്തിയാണ് വേട്ടയ്ക്കൊരു മകന്‍.

വേട്ടയ്ക്കൊരു മകന്‍ വിക്കിയില്‍

ഫോട്ടോ: കണ്ണൂരാന്‍
വീഡിയോ കടപ്പാട്: തോറ്റം, വെള്ളാട്ടം - പി.പ്രമോദ് കുമാര്‍
തെയ്യം: ഇ.സുനില്‍ കുമാര്‍
(വീഡിയോ ക്വാളിറ്റി മോശമാണ്, സദയം ക്ഷമിക്കുമല്ലൊ)

വയനാട്ടുകുലവന്‍

2008-02-23T06:07:00.000-08:00

വയനാട്ടുകുലവന്‍ തെയ്യത്തിന്റെ പുരാവൃത്തം പരമശിവനുമായി ബന്ധപ്പെട്ടതാണ്. ഒരിക്കല്‍ ശിവബീജം ഭൂമിയില്‍ പതിക്കാനിടയാകുകയും, അതില്‍ നിന്നും മൂന്ന് വൃക്ഷങ്ങള്‍ (കരിംതെങ്ങ്) ഉണ്ടാവുകയും ചെയ്തു. ആ വൃക്ഷത്തിന്റെ ചുവട്ടില്‍ ‘മധു’ ഊറിവരാറുണ്ടായിരുന്നു. ഒരിക്കല്‍ വേടരൂപം ധരിച്ച പരമശിവന്‍ വേട്ടയ്ക്കായി കാട്ടിലെത്തിയപ്പോള്‍ അങ്ങിനെ ഊറി വന്ന ‘മധു’ കാണാനിടയാവുകയും, ‘മധു’ കുടിച്ച് മത്തവിലാസം ശിവഭ്രാന്താടുകയും ശ്രീപാര്‍വ്വതി ഭയപ്പെട്ടോടുകയും
ചെയ്തു.

“വേടരൂപം ധരിച്ചുള്ള കൈലാസനാഥന്‍
വേട്ടയ്ക്കായെഴെന്നള്ളി വനത്തില്‍ പുക്കു
കണ്ടുടനെ കരിംതെങ്ങിന്‍ കുറുംകുലമേല്‍
മധുപൊഴിയും വാനുലോകം പൊഴിയുന്നല്ലൊ
അതുകണ്ട് പരമശിവന്‍ അടുത്തു ചെന്നു
മധു കുടിച്ചു മത്തവിലാസം ശിവഭ്രാന്താടി
അതു കണ്ടിട്ടചലമകള്‍ ഭയപ്പെട്ടോടി”
എന്നിങ്ങനെയാണ് ഇതേക്കുറിച്ച് തോറ്റം പാട്ടില്‍ പറയുന്നത്.

ഇതുകണ്ട് ഭയന്ന് പാര്‍വ്വതി തന്റെ മന്ത്രശക്തിയാല്‍ ‘മധു’ തടവി മുകളിലേക്കുയര്‍ത്തി. പിറ്റെ ദിവസം ‘മധു’ കുടിക്കാനായി വന്ന ശിവന് ‘മധു’ തെങ്ങിന്‍ മുകളിലെത്തിയതായാണ് കാണാന്‍ കഴിഞ്ഞത്. ഇതു കണ്ട് കോപിഷ്ഠനായ ശിവന്‍ തൃജ്ജടകൊണ്ട് തൃത്തുടമേല്‍ തല്ലി ബഹുശോഭയോടുകൂടിയ ‘ദിവ്യനെന്ന’ പുത്രനെ സൃഷ്ടിച്ചു. തെങ്ങില്‍ നിന്നും ‘മധു’ എടുക്കുന്ന ജോലിക്കായി അവനെ നിയോഗിച്ചു. പതിവായി ‘മധു’ ശേഖരിക്കുന്ന ദിവ്യനും ‘മധുപാനം’ ആരംഭിച്ചു.

ഇതറിഞ്ഞ പരമശിവന്‍ ‘കദളീമധുവന’ത്തില്‍ നായാടരുതെന്നും അവിടുത്തെ ‘മധു’ കുടിക്കരുതെന്നും വിലക്കി. എന്നാല്‍ വിലക്കു വകവെക്കാതെ ദിവ്യന്‍ ‘കദളീമധുവന‘ത്തില്‍ നായാടുകയും മധുകുംഭം തുറക്കുകയും ചെയ്തു. ശിവകോപത്തിനിരയായ അവന്റെ കണ്ണുകള്‍ പൊട്ടി മധുകുംഭത്തില്‍ വീണു. വാക്കു പാലിക്കാത്ത മകനുള്ള ശിക്ഷ.

മാപ്പിരന്ന മകന് പൊയ്‌കണ്ണ് നല്‍കി അനുഗ്രഹിച്ച് ഭൂമിയിലേക്കയച്ചു. അങ്ങിനെ വയനാട്ടില്‍ എത്തിച്ചേര്‍ന്ന ‘ദിവ്യന്‍’ വയനാട്ടുകുലവനെന്നറിയപ്പെടാന്‍ തുടങ്ങി. ഈ ദൈവം വാണവര്‍കോട്ടയില്‍ എഴുന്നള്ളിയതായും, ദൈവത്തിന്റെ കോലം കെട്ടിയാടണമെന്നും അവിടുത്തെ വാഴുന്നവര്‍ക്ക് സ്വപ്നമുണ്ടായി. അപ്രകാരമാണ് വയനാട്ടുകുലവന്‍ തെയ്യം കെട്ടിയാടാന്‍ തുടങ്ങിയതത്രെ.

വയനാട്ടുകുലവന്റെ ഉരിയാട്ടം അതീവ രസകരമാണ്. തമാശരൂപത്തില്‍ ഗൌരവമായ കാര്യങ്ങള്‍ പറയുന്ന ശൈലിയാണ് വയനാട്ടുകുലവന്റേത്.
“കണ്ണും കാണൂല്ല, ചെവിയും കേക്കൂല തൊണ്ടച്ചന്
എന്നാല്‍ കരിമ്പാറമേല്‍ കരിമ്പനിരിയുന്നത് കാണാം,
നെല്ലിച്ചപ്പ് കൂപത്തില്‍ വീഴുന്നത് കേള്‍ക്കാം”
വളരെ അര്‍ത്ഥവത്തായ ഇത്തരം വാചകങ്ങളാണ് ഭക്തര്‍ക്ക് അനുഗ്രഹം നല്‍കികൊണ്ട് വയനാട്ടുകുലവന്‍ തെയ്യം പറയാറ്.

വടക്കെ മലബാറിലെ തീയ്യ സമുദായത്തില്‍ പെട്ടവരുടെ പ്രധാന ആരാധനാമൂര്‍ത്തിയാണ് വയനാട്ടുകുലവന്‍. വയനാട്ടുകുലവന്റെ പരികര്‍മ്മിയായി എപ്പോഴും തീയ്യ സമുദായത്തില്‍ പെട്ട ആളാണുണ്ടാവുക. എന്നാല്‍ നായര്‍/നമ്പ്യാര്‍ തറവാ‍ടുകളില്‍ വയനാട്ടുകുലവന്റെ സ്ഥാനങ്ങളും കോട്ടങ്ങളുണ്ട്. തീയ്യ സമുദായത്തില്‍ പെട്ടവര്‍ വയനാട്ടുകുലവന്‍ തെയ്യത്തെ തൊണ്ടച്ചന്‍ തെയ്യമെന്നും വിളിക്കാറുണ്ട്. പരമ്പരാഗതമായി വണ്ണാന്‍ സമുദായത്തില്‍ പെട്ട ആളുകളാണ് ഈ തെയ്യം കെട്ടാറുള്ളത്. ഈ തെയ്യത്തിനു തോറ്റം, വെള്ളാട്ടം, തെയ്യം എന്നിങ്ങനെ മൂന്ന് ഭാഗങ്ങളുണ്ടാകും. ഈ തെയ്യം പ്രസാദമായി കവുങ്ങിന്‍(കമുകിന്‍) പൂവാണ്.

കണ്ണൂര്‍ ജില്ലയിലെ പലഭാഗങ്ങളിലും എല്ലാ വര്‍ഷവും വയനാട്ടുകുലവന്‍ തെയ്യം കെട്ടിയാടുമെങ്കിലും, കാസര്‍ഗോഡ് ജില്ലയില്‍ വയനാട്ടുകുലവന്‍ ദൈവ് കെട്ട് വളരെ വര്‍ഷം കൂടുമ്പോള്‍ മാത്രമേ ആഘോഷിക്കാറുള്ളൂ. പെരുങ്കളിയാട്ടം പോലെ വമ്പിച്ച ഒരു പരിപാടിയായാണ് വയനാട്ടുകുലവന്‍ ദൈവ് കെട്ട് നടക്കുക. 3 ദിവസങ്ങളായി നടക്കുന്ന ദൈവം കെട്ടിന് മുന്നോടിയായി നാള്‍മരം മുറിക്കല്‍, കലവറ നിറക്കല്‍ തുടങ്ങിയ പരിപാടികള്‍ ഉണ്ടാവും. വയനാട്ടുകുലവന്‍ തെയ്യത്തിന്റെ കൂടെ കാര്‍ന്നോന്‍ തെയ്യം, കോരച്ചന്‍ തെയ്യം, കണ്ടനാര്‍ കേളന്‍ തെയ്യം, വിഷ്ണുമൂര്‍ത്തി തുടങ്ങിയ തെയ്യക്കോലങ്ങളും കാസര്‍ഗോഡ് ഭാഗത്ത് ഉണ്ടാകാറുണ്ട്. ആദ്യ ദിവസം തെയ്യം കൂടല്‍, രണ്ടാം ദിവസം തെയ്യങ്ങളുടെ വെള്ളാട്ടം, മൂന്നാം ദിവസം രാവിലെ മുതല്‍ തെയ്യ പുറപ്പാട് എന്നിവ നടക്കും. വൈകുന്നേരം നാലുമണിയോടെയാണ് തൊണ്ടച്ചന്‍ തെയ്യം അരങ്ങിലെത്തുക. വിവിധ സംഘങ്ങളായി കാട്ടിലേക്ക് നായാട്ടിനു പോകുകയും കാട്ടുപന്നിപോലുള്ള കാട്ടുമൃഗങ്ങളെ വേട്ടയാടി കൊണ്ടുവരികയും ചെയ്യും. രണ്ടാം ദിവസംരാത്രി നായാട്ടുകാര്‍ കൊണ്ടുവന്ന മൃഗങ്ങളെ, കണ്ടനാര്‍ കേളന്‍ തെയ്യത്തിന്റെ വകയില്‍ ബപ്പിടല്‍ ചടങ്ങു നടക്കും. അതിന്നു ശേഷം അവയെ പാകം ചെയ്ത് തെയ്യം കാണാന്‍ വന്നവര്‍ക്കെല്ലാം ഭക്ഷണത്തോടൊപ്പം വിളമ്പും.വളരെ അനുഷ്ഠാനങ്ങളോടു കൂടിയാണ് ഇത്തരം ചടങ്ങുകള്‍ നടത്തുക. ഇത്തരം മൃഗനായാട്ട് കേരള സര്‍ക്കാര്‍ ഔദ്യോഗികമായി നിരോധിച്ചിട്ടുണ്ടെങ്കിലും ഇന്നും നിര്‍ബാധം തുടരുന്നുണ്ട്.

ഈ പോസ്റ്റിലെ ആദ്യ ചിത്രം വെള്ളാട്ടത്തിന്റെ മുഖത്തെഴുതുന്നതും, 2, 3 ചിത്രങ്ങള്‍ വയനാട്ടുകുലവന്റെ വെള്ളാട്ടത്തിന്റെയും, 4 മുതലുള്ള ചിത്രങ്ങള്‍ തെയ്യത്തിന്റേതുമാണ്. ചിത്രങ്ങള്‍ ഞാനെടുത്തതാണ്, പല പോരായ്മകളുമുണ്ടാകും.

വയനാട്ടുകുലവന്റെ തോറ്റം വിക്കിയില്‍ ലഭ്യമാണ്, ശ്രീലാലിന്റെ പ്രയത്നത്തിനു നന്ദി.

റഫറന്‍സ്: 1. കളിയാട്ടം, സി.എം.എസ്.ചന്തേര
2. നാടന്‍ പാട്ടു മഞ്ജരി, ഡോ.എം.വി.വിഷ്ണു നമ്പൂതിരി
3. തെയ്യത്തിലെ ജാതിവഴക്കം, ഡോ.സഞ്ജീവന്‍ അഴീക്കോട്

മീനമൃത്

2007-12-03T20:43:00.000-08:00

നമ്മുടെ അമ്പലങ്ങളില്‍ മദ്യവും, മാംസവും, മത്സ്യവുമെല്ലാം നിഷിദ്ധമെന്നായിരുന്നു പൊതുവെയുള്ള ധാരണ. എന്നാല്‍ ഇത് അബദ്ധധാരണയാണെന്ന് മനസ്സിലാക്കുവാന്‍ ഉത്തര മലബാറിലെ വിവിധ അമ്പലങ്ങളില്‍ പിന്തുടര്‍ന്നു വരുന്ന ആചാരങ്ങളെക്കുറിച്ചും, തെയ്യങ്ങളുമായി ബന്ധപ്പെട്ടു നില്‍ക്കുന്ന ചടങ്ങുകളെ കുറിച്ചും പഠിച്ചാല്‍ മനസ്സിലാകും. പറശ്ശിനിക്കടവു മുത്തപ്പന്‍ ക്ഷേത്രത്തിലെ ആരാധനാ മൂര്‍ത്തിയായ മുത്തപ്പന്റെ ഇഷ്ടപാനീയം കള്ളാണ്, ഇഷ്ട നൈവേദ്യം ഉണക്കമീനും. ഉത്തര മലബാറിലെ ഒട്ടു മിക്ക തെയ്യങ്ങള്‍ക്കും കലശം സമര്‍പ്പിക്കുക എന്നൊരു ചടങ്ങുണ്ട്. തെങ്ങിന്‍ കള്ള് മണ്‍പാനിയില്‍ നിറച്ച് കുരുത്തോലകൊണ്ട് അലങ്കരിച്ചാണ് കലശം ഉണ്ടാക്കുന്നത്. മാടായിക്കാവിലും, കളരിവാതുക്കല്‍ ഭഗവതി ക്ഷേത്രത്തിലും, മാമാനത്തമ്പലത്തിലും പ്രധാന നൈവേദ്യമാണ് കോഴിയിറച്ചി.

ഉത്തര മലബാറിലെ കളിയാട്ടങ്ങളില്‍ കാണുന്ന അനാദൃശ്യമായ ചടങ്ങുകളിലൊന്നാണ് മീനമൃത്.

മത്സ്യബന്ധനം കുലത്തൊഴിലായിട്ടുള്ള വെള്ളുവ സമുദായത്തില്‍ പെട്ട ആളുകള്‍ക്കാണ് മീനമൃത് എടുക്കുവാനുള്ള അധികാരം. ഈ കുടുംബത്തില്‍ പെട്ട ഒരാളെ വെള്ളുവക്കുറുപ്പായി സ്ഥാനം നല്‍കിയിട്ടുണ്ടാകും.വെള്ളുവക്കുറുപ്പിന്റെ നേതൃത്വത്തിലാണ് മീനമൃത് കൊണ്ടുവരിക.

കളിയാട്ടത്തോടനുബന്ധിച്ച തെയ്യങ്ങള്‍ വൈകുന്നേരങ്ങളിലാണ് ഉണ്ടാവുകയെങ്കിലും, മീനമൃതിനുള്ള തയ്യാറെടുപ്പ് രാവിലെ മുതല്‍ തന്നെ ആരംഭിക്കും. കാവില്‍/അമ്പലത്തില്‍ നിന്നുള്ള തീര്‍ത്ഥവുമായി പുഴക്കരയിലുള്ള തറവാട്ടിലേക്ക് രാവിലെ തന്നെ വെള്ളുവക്കുറുപ്പ് പുറപ്പെടും. വീട്ടിലൊരുക്കിയ സദ്യ കഴിച്ചതിനു ശേഷം തറവാട്ടില്‍ വിളക്കു കൊളുത്തി മീന്‍ പിടിക്കാനായി സംഘത്തോടൊപ്പം യാത്രയാവും. മീനമൃതിനാവശ്യമായത്ര മീന്‍ ലഭിച്ചു കഴിഞ്ഞാല്‍ തറവാട്ടിലേക്ക് തിരിച്ചു വരും. പരല്‍ മീനുകളാണ് മീനമൃതിനായി സാധാരണ ഉപയോഗിച്ചു വരുന്നത്. അവിടെ വച്ച് മീനുകളെ ‘കോയ’കളാക്കി തിരിക്കും. ഈര്‍ക്കില്‍ ഉപയോഗിച്ച് ലഭിച്ച മീനുകളെ കോര്‍ത്താണ് ‘കോയ’കളുണ്ടാക്കുന്നത്. പ്രസ്തുത ‘കോയ’കള്‍ കാലകാലങ്ങളായി ഉപയോഗിച്ചു വരുന്ന ‘തണ്ടില്‍’ കൊളുത്തിയിട്ട് വൈകുന്നേരം അമ്പലത്തിലേക്ക്/ കാവിലേക്ക് പുറപ്പെടുകയായി. വള്ളുവക്കുറുപ്പും പരിവാരങ്ങളും ‘ശീ....ഓം......, ശീം.. ഓം...... വിളികളുമായും ചീനിക്കുഴല്‍, മദ്ദളം, ഇലത്താളം എന്നീ വാദ്യങ്ങളുടെ അകമ്പടിയോടെയും യാത്രയാകും.

അമ്പലത്തില്‍/ കാവിലേക്ക് എത്തുന്ന വെള്ളവക്കുറുപ്പിനെയും, മീനമൃതിനെയും ക്ഷേത്രത്തിലെ ആചാരക്കാര്‍ അരിയെറിഞ്ഞു സ്വീകരിക്കും. അമ്പലമുറ്റത്ത് / കാവിലെ മുറ്റത്ത് സമര്‍പ്പിക്കുന്ന മീനമൃത് ക്ഷേത്രത്തിലെ അവകാശികള്‍ക്കും മറ്റുള്ളവര്‍ക്കുമായി വീതിച്ചു നല്‍കും.

വളരെ അപൂര്‍വ്വം അമ്പലങ്ങളില്‍/കാവുകളില്‍ മാത്രമുള്ള ഇത്തരം ചടങ്ങുകള്‍ നല്‍കുന്ന സന്ദേശം വളരെയധികം ശ്രദ്ധിക്കപ്പെടേണ്ടതാണ്.

ഫോട്ടോ: പ്രസാദ്

മാപ്പിള തെയ്യങ്ങള്‍

2007-11-19T00:32:00.000-08:00

ഓരോ തെയ്യത്തിനും തനതായ പുരാവൃത്തമുണ്ട്. ഇത്തരം പുരാവൃത്തങ്ങളില്‍ മാപ്പിളകഥാപാത്രങ്ങളും ഉണ്ടായിരുന്നുവെന്നത് വളരെ അത്ഭുതകരമായി തോന്നാം. ആലിച്ചാമുണ്ഡി, ആര്യപ്പൂങ്കന്നി എന്നീ തെയ്യങ്ങള്‍ മാപ്പിള സമുദായക്കാരാണത്രെ. കരിഞ്ചാമുണ്ഡി തെയ്യത്തിന്റെ പുരാവൃത്തത്തിലും മാപ്പിള കഥാപാത്രങ്ങളെ കാണാം.

ഉഗ്രമാന്ത്രികനായിരുന്ന ആലിയെ നാട്ടുകാര്‍ ചതിച്ചു കൊന്നുവെന്നും, അതിനുശേഷം നാട്ടില്‍ ദുര്‍ന്നിമിത്തങ്ങള്‍ കണ്ടുതുടങ്ങിയെന്നും, അതേതുടര്‍ന്ന മാന്ത്രികനായ ആലിക്ക് കോലം കല്‍പ്പിച്ച് കെട്ടിയാടിച്ചുവെന്നുമാണ് വിശ്വസിച്ചു വരുന്നത്. ആര്യപ്പൂങ്കന്നി ഭഗവതി മരക്കലത്തില്‍ വന്ന മുസ്ലീം കന്യകയാണെന്നാണ് വിശ്വസിക്കുന്നത്. ഈ തെയ്യത്തിന്റെ പുറപ്പാട് പര്‍ദ്ദപോലെയുള്ള തുണി ധരിച്ചാണ്. ഭഗവതിയെ കൊണ്ടുവന്ന കപ്പിത്താനാണ് ബപ്പൂരാന്‍. ബപ്പൂരാനും മാപ്പിള സമുദായത്തില്‍ പെട്ടയാളത്രെ. അണ്ടലൂര്‍ കാവിലെ ബപ്പൂരാനല്ല, ആ ബപ്പുരാന്‍ ഹനുമാന്‍ ആണെന്നാണ് വിശ്വാസം.

ചില തെയ്യക്കോലങ്ങളുടെ ഒപ്പം മാപ്പിളപൊറാട്ടും പതിവുള്ളതാണ്

കരിഞ്ചാമുണ്ഡി തെയ്യത്തിന്റെ ഇതിവൃത്തവും ഒരു മാപ്പിളകുടുംബവുമായി ബന്ധപ്പെട്ടതാണ്. പായ്യത്തുമലയില്‍ താമസിച്ചിരുന്ന ഒരു മാപ്പിളയുടെ ഭാര്യക്ക് പേറ്റുനോവുണ്ടാവുകയും, പോറ്റിച്ചിയെ തേടി പോയപ്പോള്‍ കാട്ടില്‍ വെച്ച് കണ്ടു മുട്ടിയ സുന്ദരി പേറെടുക്കാന്‍ തയ്യാറായി കൂടെ വരികയും ചെയ്തു. എന്നാല്‍ സമയമേറെ കഴിഞ്ഞിട്ടും ഈറ്റില്ലത്തില്‍ നിന്നും യാതൊരു ശബ്ദവും കേള്‍ക്കാത്തതിനാല്‍ അകത്തു ചെന്നു നോക്കിയപ്പോള്‍ ചോരവാര്‍ന്നു മരിച്ചുകിടക്കുന്ന പ്രിയതമയെയാണ്. ഉടന്‍ കയ്യില്‍ കിട്ടിയ ഉലക്കയുമായി പോറ്റിച്ചിയെ തേടി കാട്ടില്‍ പോവുകയപ്പോള്‍ വള്ളിയിലിരുന്നാടുന്ന സുന്ദരിയെയാണ്. തന്റെ കോപം തീര്‍ക്കാന്‍ ഉലക്കകൊണ്ട് ആഞ്ഞടിച്ചപ്പോള്‍ നടുവൊടിയുകയും ആ സുന്ദരി ഭയങ്കര രൂപം പ്രാപിച്ച് മാപ്പിളയെ കൊല്ലുകയും ചെയ്തുവെന്നാണ് ഐതിഹ്യം. ആ കാട്ടുമൂര്‍ത്തിയാണ് കരിഞ്ചാമുണ്ഡി. പണ്ടുകാലത്ത് ഈ തെയ്യം മാപ്പിളമാരും, സ്ത്രീകളും കാണാറില്ലായിരുന്നു. തെയ്യങ്ങള്‍ ഓരോരോ സമുദായക്കാരെയും അഭിസംബോധന ചെയ്യുന്നത് പ്രത്യേക നാമത്തിലാണ്. ഉയര്‍ന്ന സമുദായക്കാരായ നായന്മാര്‍ അകമ്പടികളാണെങ്കില്‍, തീയ്യര്‍ എട്ടില്ലം കരുമനയും, മാപ്പിളമാര്‍ മാടായി നഗരവുമാണ്.

ഇപ്പോഴും തെയ്യം കാണാന്‍ വരുന്ന മാപ്പിളമാരോട് ഉരിയാടുന്നത് ഇപ്രകാരമത്രെ.

“ചേരമാന്‍ പെരുമാള് കൊടുങ്ങല്ലൂര്‍ത്തുറമുഖത്തു നിന്ന് ഗൂഢമായി കപ്പല്‍ കയറി. കൊയിലാണ്ടിക്കൊല്ലത്തെ തൂക്കില്‍ ഒരു ദിവസം പാര്‍ത്തു. പിറ്റേ ദിവസം ധര്‍മ്മപട്ടണത്തെത്തി. ധര്‍മ്മപട്ടണത്തു കോവിലകം രക്ഷിപ്പാന്‍ സാമൂതിരിയെ ഏല്‍പ്പിച്ചു. കൊടുങ്ങല്ലൂരില്‍ നിന്ന് കപ്പല്‍ക്കാരും മറ്റും പോയി പെരുമാള്‍ കയറിയ കപ്പല്‍ക്കാരുമായി വളരെ യുദ്ധമുണ്ടാക്കി. വീടുകൂടാതെ സഹര്‍ മുക്കല്‍ ഹയാബന്തറില്‍ ചെന്നിറങ്ങുകയും ചെയ്തു. അപ്പോള്‍ മുഹമ്മദ്നബി ജിദ്ദയെന്ന നാട്ടില്‍ പാര്‍ത്തു വരുന്നു. അവിടെ ചെന്നു കണ്ട് മാര്‍ഗ്ഗം വിശ്വസിച്ചു. താജുദീന്‍ എന്നു പേരായി മാലിക്കഹബിയാറെ എന്ന അറബിയില്‍ രാജാവിന്റെ പെങ്ങളായ റീജിയത്ത് എന്നവളെ കെട്ടി അഞ്ചുവര്‍ഷം പാര്‍ത്തു. താജുദീന്‍ കഴിഞ്ഞ് മലയാളത്തില്‍ വന്ന് ദീന്‍ നടത്തേണ്ടുന്നതിനു യാത്ര ഒരുങ്ങിയിരിക്കുമ്പോള്‍ ദീനം പിടിച്ചു കഴിഞ്ഞു. താനുണ്ടാക്കിയതായ പള്ളിയില്‍ത്തന്നെ മറയുകയും ചെയ്തു. അപ്പോള്‍ പെരുമാളുടെ എഴുത്തും മുദ്രയും പുറപ്പെടുവിച്ചു. രണ്ട് കപ്പലിലായിക്കയറി അവിടുന്ന് പതിനൊന്ന് തങ്ങമ്മാര് കൊടുങ്ങല്ലൂര്‍ വന്നു. രാജസമ്മതത്താലെ ഒരു പള്ളിയുണ്ടാക്കി. മാടായിപ്പള്ളി, അബ്ദുറഹിമാന്‍ പള്ളി, മുട്ടത്തുപ്പള്ളി, പന്തലായിനിപള്ളി, സെയിനുദ്ദീന്‍ ഖാദി.. ഇങ്ങനെ പതിനൊന്നു കരിങ്കല്ലുകൊണ്ടു വന്ന് പതിനൊന്നു പള്ളികളുണ്ടാക്കി. അപ്രകാരമല്ലെ എന്റെ മാടായി നഗരേ??“

ഏകദൈവ വിശ്വാസികളായ മാപ്പിളമാര്‍ തെയ്യങ്ങളെ ആരാധിക്കാറില്ലെങ്കിലും, ഗ്രാമോത്സവമായ കളിയാട്ടങ്ങളില്‍ സജീവമായി പങ്കെടുത്തു പോന്നിരുന്നു. മുന്‍‌കാലങ്ങളില്‍ നില നിന്നിരുന്ന ജാതി മതങ്ങള്‍ക്കതീതമായ വിശ്വാസങ്ങളുടെയും, കൂട്ടായ്മയുടെയും ഉത്തമോദാഹരണമായി ഇതിനെ കാണാം.

ഫോട്ടോ: മാപ്പിളപൊറാട്ട്, ഫോട്ടോഗ്രാഫര്‍: പ്രസാദ്

റഫ: കളിയാട്ടം, സി.എം.എസ്.ചന്തേര

പൊട്ടന്‍ തെയ്യം (വീഡിയോ)

2007-06-20T19:16:00.000-07:00

കണ്ണൂരാന്റെ ഈ പോസ്റ്റിന്റെ ഒരു വീഡിയൊ പോസ്റ്റ്

പൊട്ടന്‍ തെയ്യം

ഗുളികന്‍

2007-06-08T05:16:00.000-07:00

nga

നട്ടുച്ചയ്ക്ക് കാട്ടില്‍ ചെണ്ടകൊട്ട്.
കാടുണരുന്നു.

പൊടുന്നനെ,
കത്തിച്ച ചൂട്ടുമായ് ഗുളികന്‍ പ്രത്യക്ഷപ്പെടുന്നു.

അസുരതാളം കൊട്ടികയറുമ്പോള്‍ നിവേദ്യമായി കലശംവെച്ച കള്ളുകുടിച്ച് ഗുളികനാടുന്നു.

ഇത് ഗുളികന്‍ തെയ്യം. ഗുളികന്റെ കുടിയിരുത്തം കാട്ടില്‍, മരത്തില്‍ ചാരിവെച്ച ശൂലത്തിലാണ്. ‘ഗുളികന് കലശം വെച്ചോളാം‘ എന്നാണ് പ്രാര്‍ത്ഥന. കലശം വെയ്ക്കേണ്ടത് കള്ള്. കെട്ടുന്ന നാട്ടിലേയും കെട്ടാന്‍ അവകാശമുള്ള തെയ്യക്കാര്‍ക്കും അനുസരിച്ച് ഗുളികന്റെ രൂപത്തിലും ഭാവത്തിലും വെത്യാസമുണ്ടാകും. ഇത് കാസറഗോഡ് ജില്ലയിലെ തുളുഭാഷ സംസാരിക്കുന്ന കോപ്പാളന്മാരുടെ ഗുളികനാണ്.

മുന്‍പ് എന്റെ ബ്ലോഗില്‍ പ്രസിദ്ധികരിച്കതാണ് (link). ശ്രീജിത്ത് പറഞ്ഞതുപ്രകാരം ഇവിടെ വീണ്ടും പ്രസിദ്ധീകരിക്കുന്നു.

ദൈവത്തിനും മനുഷ്യനും ഇടയില്‍

2007-05-24T00:03:00.000-07:00

ഭഗവതി

2007-05-02T09:35:00.000-07:00

ഫോട്ടോഗ്രാഫര്‍: മിഥുന്‍

പുതിയോത്ര(പുതിയ ഭഗവതി തിറ), വീഡിയോ പോസ്റ്റ്

2007-05-02T07:35:00.000-07:00

പുതിയോത്ര എന്നത് പുതിയ ഭഗവതി തിറ എന്നതിന്റെ കണ്ണൂര്‍ ഭാഷ.
സാധാരണയായി പുതിയഭഗവതിയെ കൂടാതെ വീരന്‍,വീരാളി,വിഷ്ണുമൂര്‍ത്തി,ഭദ്രകാളി എന്നി തെയ്യങ്ങളും പുതിയോത്രക്ക് ഉണ്ടാകും.വെളിച്ചപ്പാടന്‍ പിന്നെ എല്ലാ സ്ഥലത്തും നിറഞ്ഞു നില്‍ക്കും.കടൂര്‍ കാഞ്ഞിരത്തിന്‍ കീഴില്‍ പുതിയഭഗവതി തിറ മഹോത്സവത്തിന്റെ ചില പകര്‍ത്തിവെയ്പ്പുകളാണ് ചുവടെ.

ഇത് പുതിയ ഭഗവതിയുടെ ഒരുക്കം.വെളിച്ചപ്പാടനുമായുള്ള സംവാദത്തിന്റെ തുടക്കം.തീപ്പന്തങ്ങളുടെയും വാളിന്റെയും തിളക്കം.
ഭക്തജനങ്ങളുടെ വണക്കം.

ഇത് പുതിയോതിയും വെളിച്ചപ്പാടും തമ്മിലുള്ള ഒരു നിശബ്ദ സംവാദമാണ്.വെളിച്ചപ്പാടന്റെ കയ്യിലുള്ള വാളും പരിചയും വാങ്ങാന്‍ ആണ് പുതിയോതിയുടെ ഉദ്യമം. ഏറെ നേരത്തെ ശ്രമത്തിനു ശേഷം പുതിയോതി വാള്‍ കൈക്കലാക്കുന്നു.

ആയുധം കിട്ടിയല്ലോ!.... ആദ്യത്തെ അനുഗ്രഹം നിനക്കിരിക്കട്ടെ വെളിച്ചപ്പാടാ..!“ഏറിയോരു സന്തോഷമായി!”

ഉറഞ്ഞാടുന്ന ഭഗവതി.

ഓഓഓഓഓ....ഓഓഓഓഓ.....ഓഓഓഓഓഓഓഓ.......എന്തൊരു ഗാംഭീര്യം.നാട്ടിന് ഐശ്വര്യം വരുത്തുന്നു ഈ നാട്ടു പുതിയവള്‍. ..

പുതിയോതി പണ്ട് ഒരു സുന്ദരിയായ അടിയാള പെണ്‍കൊടി ആയിരുന്നു.അവളെ നാട്ടുപ്രമാണി നോട്ടമിട്ടു.ഇംഗിതത്തിന് വഴങ്ങാതായപ്പോള് പ്രമാണി അവളെ വ്യഭിചാരക്കുറ്റത്തിന് കള്ള വിചാരണ നടത്തി അറുത്ത് കിണറ്റില് തള്ളി.അന്നു രാത്രി തന്നെ അവളുടെ പ്രേതം പുതിയ ഭഗവതിയായി വന്ന് പ്രമാണിയെ ഉപദ്രവിക്കാന്‍ തുടങ്ങി.ചെയ്ത കുറ്റത്തിന് പരിഹാരമായി പ്രമാണിയോട് ഭഗവതിയുടെ തെയ്യം കെട്ടിക്കാന്‍വേണ്ട ഏര്‍പ്പാടുകള്‍ ചെയ്യണമെന്ന് പ്രേതം പറഞ്ഞു. അങ്ങനെ ആണ് കൊല്ലാകൊല്ലം തെയ്യം കെട്ടിയാടിക്കുന്നത്.കഥക്ക് പല വകഭേദങ്ങളുണ്ടെങ്കിലും അമ്മമ്മ പറഞ്ഞ ഈ കഥയാണ് എനിക്ക് ഏറ്റവും വിശ്വസനീയം!
എല്ലാ ഭഗവതിത്തെയ്യങ്ങള്‍ക്കും പറയാനുണ്ടാവുക,പാതിവ്രത്യമോ ചാരിത്ര്യമോ സംരക്ഷിക്കാന്‍വേണ്ടി നാട്ടു പ്രമാണിമാരാല്‍ അറുകൊല ചെയ്യപ്പെട്ട കഥകളാണ്. തെയ്യത്തിന്റെ തോറ്റം ശ്രദ്ധിച്ചു കേട്ടാല്‍ കുറെ കഥകളൊക്കെ മനസ്സിലാവും.
പുതിയോതി ശിവന്റെ മകളാണെന്നാണ് സങ്കല്പം.(സൌന്ദര്യവും കഴിവും തന്റേടവുമുള്ള, ജന്മങ്ങള്‍ക്ക് ശിവന്റേയും മറ്റുള്ളവരുടെയും ദൈവാംശംവെച്ചുകൊടുക്കുന്ന സവര്‍ണ്ണന്റെ ആശ്വാസം!!അല്ലാതെ ഒരു അടിയാളപ്പെണ്ണിന് എങ്ങനെ പ്രമാണിയെ എതിര്‍ക്കാന്‍ ധൈര്യമുണ്ടാകും?!!).
ചീറുമ്പ എന്ന ഭഗവതി ഉണ്ട്.അത് പുതിയോതിയുടെ അനുജത്തി ആണ്.ഭയങ്കരി ആണ് ആള്‍. പുള്ളിക്കാരിയാണ് കുരിപ്പ്(ചിക്കന്‍ പോക്സ്) വരുത്തുന്നത്.കുരിപ്പു രോഗം മാറ്റിത്തരുന്നവളാണ് പുതിയോതി.പുതിയോതിക്ക് 4 പന്തങ്ങളാണുള്ളത്.പന്തം കാരണം,കുറച്ചുനേരം കഴിയുമ്പോള്‍ കയ്യിലെ ഓട്ടുവള ചൂ‍ടാകും.അപ്പോള്‍ സഹായികള്‍ പുതിയോതിയുടെ കൈക്ക് ഇടക്കിടെ വെള്ളം നനച്ചുകൊടുക്കും.
അധികാരിവര്‍ഗ്ഗത്തിനെതിരെയുള്ള ചെറുത്തുനില്‍പ്പിന്റെയും ചോദ്യം ചെയ്യലിന്റെയും ഒരു പ്രാചീനപാഠമാണ് തെയ്യം.കമ്മ്യൂണിസത്തിന്റെ കണ്ണൂര്‍പ്പെരുമ.!!

കോഴിയെ അറുക്കുന്നതിനു മുന്‍പ് ഇങ്ങനെ ഒക്കെ ഉണ്ട് ചില രീതികള്‍.

പുതിയോതി കോഴിയെ അറുക്കുന്നു.

ഇത് പുതിയോതിയുടെ അനുഗ്രഹം ആണ്. ‘തന്തക്കും തറവാട്ടിനും മേലാക്കത്തിനും മേല്‍ഗൃഹത്തിനും ഗുണംവരണേ...ഗുണം വരണം’

അതു വരെ അടിയാളന്‍.തെയ്യം കെട്ടിയ നിമിഷം അവന്‍ ദൈവമാകുന്നു.അവനെ അതു വരെ അടിച്ചമര്‍ത്തിയ പ്രമാണിമാരുടെ ‘തന്തക്കും തറവാട്ടിനും’ വിളിക്കുന്നു അവന്‍.തെയ്യമായി ഉറഞ്ഞാടുന്നു.അവന്റെ മുന്നില്‍ പ്രമാണിമാര്‍ തൊഴുകൈകളോടെ ‘രക്ഷിക്കണേ ദൈവേ’ എന്നും പറഞ്ഞു കേഴുന്നു.
അവന്‍ അപ്പോള്‍ ഇഹത്തിനും പരത്തിനും പൊരുളായി അരുളിച്ചെയ്യുന്നു:
“ഗുണം വരട്ടേ പൈതങ്ങളേ............”

നാട്ടു പുതിയവള്‍ നിങ്ങളെ കാത്തു രക്ഷിക്കും പൈതങ്ങളേ.....വയത്തൂര്‍കാലിയാര്‍ തിരുമുടി നല്ലച്ഛന്‍(ശിവന്‍) കനിഞ്ഞു തന്നോരു വിത്തും വിളയും നിങ്ങള്‍ക്കു വേണ്ടി ഞാന്‍ കനിഞ്ഞരുളും പൈതങ്ങളേ.......

നാലും കഴിഞ്ഞ് നാല്പത്തൊന്നു ദിവസമെത്തുന്ന നേരത്ത്............

‘അമ്മേ രക്ഷിക്കണേ....’ ഭാക്തിസാന്ദ്രം...
------------------------------------------------
ഇവിടെയുള്ള വീഡിയോസ് കാണാന്‍ പറ്റുന്നില്ലെങ്കില്‍ ഈ ലിങ്ക് ക്ലിക്ക് ചെയ്യുക

പൂരം, പൂരക്കളി

2007-03-23T01:36:00.000-07:00

മീന മാസത്തിലെ കാര്‍ത്തിക മുതല്‍ പൂരം നക്ഷത്രം വരെയാണ് കോലത്തുനാട്ടിലും അള്ളടം നാട്ടിലും പൂരം ആഘോഷിച്ചു വരുന്നത്. കോപാകുലനായ മഹദേവന്റെ മൂന്നാം കണ്ണിനാല്‍ ഭസ്മമായിപ്പോയ തന്റെ കാമദേവനെ ജീവിപ്പിക്കാനായി അപേക്ഷിച്ച രതീദേവിയോട് വിഷ്ണുഭഗവാന്‍ പൂക്കള്‍ കൊണ്ട് കാമവിഗ്രഹം ഉണ്ടാക്കി പൂജിക്കാന്‍ ആവശ്യപ്പെട്ട കഥയാണ് പൂരോത്സവത്തിനു പിന്നില്‍. പ്രായപൂര്‍ത്തി തികയാത്ത പെണ്‍കുട്ടികള്‍ വ്രതം നോറ്റ് ഈ ദിവസങ്ങളില്‍ ചാണകം കൊണ്ട് (ചിലയിടങ്ങളില്‍ മണ്ണുകൊണ്ടും, ചിലയിടങ്ങളില്‍ പൂ മാത്രവും) കാമവിഗ്രഹം ഉണ്ടാക്കി പൂജിച്ചു വരുന്നു. എല്ലാ പൂക്കളും പൂവിടാനായി ഉപയോഗിക്കാറില്ല. സാധരണയായി നമ്മുടെ പടിപ്പുരക്കു പുറത്തുള്ള ചെമ്പകപ്പൂ, മുരിക്കിന്‍പൂ, നരയന്‍ പൂ, എരിഞ്ഞി പൂ തുടങ്ങിയ പൂക്കളാണ് ഇതിനായി ഉപയോഗിച്ചു വരുന്നത്. പൂരദിവസം കാമദേവനെ “പറഞ്ഞയ്ക്കല്‍” ചടങ്ങാണ്. “നേരത്തെ കാലത്തെ വരണേ കാമാ..., കിണറ്റിന്‍ പടമ്മല്‍ പോലെ കാമാ....” തുടങ്ങിയ മുന്നറിയിപ്പുകളുമായി വീട്ടിലെ വരിക്കപ്ലാവിന്റെ ചുവട്ടിലേക്ക് പറഞ്ഞയക്കും. പൂരദിവസം പ്രത്യേകമായി തയ്യാറാ ക്കുന്ന പൂരടയും, പൂരക്കഞ്ഞിയുമൊക്കെ ഉണ്ടാക്കി കാമന് സമര്‍പ്പിക്കും. ഉത്തരമലബാറിലെ മിക്കവാറും ക്ഷേത്രങ്ങളില്‍ പൂരം ആഘോഷിക്കുമെങ്കിലും, മാടായിക്കാവിലെ പൂരാഘോഷവും, പൂരം കുളിയും വളരെ പ്രശസ്ത്മാണ്.

പൂരോത്സവം പെണ്‍കുട്ടികളുടെ ആഘോഷമാണെങ്കില്‍, പൂരക്കളി വാല്യക്കാരുടേതാണ്. പണ്ടുകാലത്ത് പെണ്‍കുട്ടികളാണ് പൂരക്കളി കളിച്ചിരുന്നതെന്നാണ് വിശ്വാസം. പൂരക്കളി നിയന്ത്രിക്കുന്നത് പണിക്കരാണ്. സാധാരണയായി ഓരോ കാവിലും ഓരോ പണിക്കരെ നിശ്ചയിച്ച് ആചാരപ്പെടുത്തിയിട്ടുണ്ടാകും. പണിക്കര്‍ പൂരിക്കളിയില്‍ വളരെ വിദഗ്ധനും മുഴുവന്‍ പാട്ടുകളും‍ അറിയുന്നയാളുമായിരിക്കും. പൂരക്കളി പന്തലില്‍ കത്തിച്ചു വച്ച വിളക്കിനും ചുറ്റും ഈണത്തോടെ പാട്ടുപാടി അതീവ ചാരുതയോടെയും, മെയ്‌വഴക്കത്തോടെയുമാണ് പൂരക്കളി അവതരിപ്പിക്കുക. പൂരക്കളി പാട്ടുകള്‍ 18 നിറങ്ങള്‍ അഥവ പൂരമാലകള്‍ എന്നാണ് അറിയപ്പെടുന്നത്. കാമദേവന്റെ പുനര്‍ജനിക്കായി പൂവുകള്‍ കൊണ്ട് കാമവിഗ്രഹം നിര്‍മ്മിച്ച് പൂവിട്ട് നാരായണ സങ്കീര്‍ത്തനം ചെയ്ത് കളിച്ച കളികളാണത്രെ നിറങ്ങള്‍.

“നാരായണ... നാരായണ
വാസുദേവാ കൈതൊഴുന്നേന്‍
ആഴിയതില്‍ പള്ളികൊള്ളും
ആഴിമാതാ വാഴും ദേവന്‍.....

എന്നിങ്ങനെ അതീവ ഹൃദ്യമായ, അതിലളിതമായ പദവിന്യാസത്തോടെയാണ് ഒന്നാം നിറം പൂരമാല. വിവിധ രാഗങ്ങളിലും, ചടുലമായ ചുവടുവയ്പ്പുകളോടെ 18 നിറങ്ങളും കണ്ണിനും കാതിനും ഇമ്പം നല്‍കുന്നവയാണ്. 18 നിറങ്ങള്‍ കഴിഞ്ഞാല്‍ വന്‍ കളികള്‍ എന്നറിയപ്പെടുന്ന ഗണപതിപ്പാട്ട്, രാമായണം, ഇരട്ട, അങ്കം തുടങ്ങിയ കളികളാണ്. ഒടുവില്‍ അതാതു ക്ഷേത്രത്തിലെ ദേവീ ദേവന്മാരെ സ്തുതിച്ചുകൊണ്ട് “പൊലി, പൊലി, പൊലി” എന്ന് പ്രകീര്‍ത്തിച്ചുകൊണ്ടാണ് പൂരക്കളി സമാപിക്കുന്നത്. ഇന്നു സ്കൂള്‍ കലോത്സവവേദിയിലെ ഒരിനമായതുകൊണ്ട് കേരളീയര്‍ക്കു മുഴുവന്‍ സുപരിചിതമാണ് പൂരക്കളി.

photo courtesy: www.payyannur.com

പൊട്ടന്‍ തെയ്യം (തോറ്റം)

2007-03-01T03:10:00.000-08:00

ശ്രീ പരമേശ്വരന്‍ ചണ്ഡാല വേഷധാരിയായി ശങ്കരാചാര്യരെ പരീക്ഷിച്ച പുരവൃത്തത്തിന്റെ പശ്ചാത്തലത്തിലുണ്ടായ തെയ്യമാണ് പൊട്ടന്‍ തെയ്യം. ഇതിവൃത്തം എല്ലാവര്‍ക്കും സുപരിചിതമായതു കൊണ്ട് വീണ്ടും ആവര്‍ത്തിക്കുന്നില്ല, പകരം പൊട്ടന്‍ തെയ്യത്തിന്റെ തോറ്റം പാട്ടിനെ ഏതാനും വരികള്‍ ഇവിടെ കൊടുക്കുകയാണ്. ശ്രീ.സി.എം.എസ്.ചന്തേര 1976ല്‍ സമാഹരിച്ച് പ്രസിദ്ധപ്പെടുത്തിയിട്ടുള്ളതാണ് ഈ തോറ്റം. തോറ്റം പാട്ട് എന്താണെന്ന് മനസ്സിലാക്കാന്‍ ഇതുപകരിക്കുമെന്ന് കരുതുന്നു. ഒപ്പം ബ്രാഹ്മണവല്‍ക്കരണം തെയ്യങ്ങളില്‍ നടന്നുവെന്ന് മുത്തപ്പന്‍, രാജു ഇരിങ്ങല്‍ എന്നിവരുടെ അഭിപ്രായത്തെക്കുറിച്ച് വായനക്കാര്‍ക്ക് വ്യക്തത കൈവരുമെന്നും പ്രതീക്ഷിക്കുന്നു. പൊട്ടന്‍ തെയ്യം മലയന്‍, പുലയന്‍, ചിറവന്‍, പാണന്‍ തുടങ്ങി പല സമുദായക്കാരും കെട്ടാറുണ്ട്. തീയില്‍ വീഴുന്ന പൊട്ടനും, തീയ്യില്‍ വീഴാത്ത പൊട്ടനും ഉണ്ട്. തെയ്യം നടക്കുന്ന സ്ഥലത്ത് പൊട്ടന്റെ തോറ്റം നടക്കുന്ന സമയത്ത് (വൈകീട്ട് 8 മണിയോടെ) പുളിമരം, ചെമ്പകമരം തുടങ്ങിയ മരങ്ങള്‍ ഉയരത്തില്‍ കൂട്ടിയിട്ട് ഉണ്ടാക്കുന്ന “മേലേരി”ക്ക് തീകൊടുക്കും. രാവിലെ 4-5 മണിയാകുമ്പോഴേക്കും ഇവ ഏകദേശം കത്തി കനലായി തീര്‍ന്നിട്ടുണ്ടാകും. ആ സമയത്താണ് പൊട്ടന്റെ തെയ്യം പുറപ്പെടുക. ഇതിനിടെ കനല്‍ മാത്രം ഒരിടത്തും, കത്തികൊണ്ടിരിക്കുന്നവ മറ്റൊരിടത്തും കൂട്ടിയിടും. പൊട്ടന്‍ തെയ്യം കത്തുന്ന തീയിലും, കനലിലിലും മാറി മാറി ഇരിക്കുകയും കിടക്കുകയുമൊക്കെ ചെയ്യും . തീയെ പ്രതിരോധിക്കുവാന്‍ കുരുത്തോലകൊണ്ടുള്ള് “ഉട” ഉണ്ടെങ്കിലും വളരെയധികം ശ്രദ്ധയോടെ ചെയ്തില്ലെങ്കില്‍ പൊള്ളലേല്‍ക്കുവാന്‍ സാധ്യതയുള്ളൊരനുഷ്ഠാനമാണിത്. കത്തുന്ന തീയില്‍ ഇരിക്കുമ്പോഴും “കുളിരണ്, വല്ലതെ കുളിരണ്“ എന്നാണ് പൊട്ടന്‍ തെയ്യം പറയാറ്!!!! കണ്ടു നില്‍ക്കുന്നവരില്‍ ഭക്തിയും ഭീതിയും ഉണര്‍ത്തുന്ന രംഗമാണിത്. കത്തുന്ന തീയില്‍ പൊട്ടന്‍ തെയ്യം കിടക്കുന്ന ചിത്രം താഴെ കാണാം. സാധാരണ തെയ്യങ്ങള്‍ക്കു കണ്ടു വരാറുള്ള് മുഖത്തെഴുത്ത് ഈ തെയ്യത്തിനില്ല പകരം മുഖത്ത് നേരത്തെ തന്നെ തയ്യാറക്കിയ മുഖാവരണം അണിയുകയാണ് പതിവ്.

പൊലിക പൊലിക പൊലിക ജനമേ...

പരദൈവം പൊലിക കാപ്പന്ത പൊലിക

പന്തല്‍ പൊലിക പതിനാറഴകിയ

കാപ്പന്തല്‍ പൊലികാ.......

മുപ്പത്ത് മൂന്ന് മരം നട്ട കാലം....

അമ്മരം പൂത്തൊരു പൂവുണ്ടെന്‍ കൈമേല്‍

പൂവും പുറിച്ചവര്‍ നാര്‍ തേടിപ്പോമ്പോ

പൂവൊടുടന്‍ ആരൊടുടന്‍ ചെന്നുകൊള്ളാം

തിരി തിരി തിരി തിരി തിരി തിരി പുലയാ....

വഴി തിരി തിരി തിരി കള്ളപ്പുലയാ......

തിരി തിരിയെന്ന് തിരിയാന്‍ പറഞാല്‍

തിരിവാനും പാരം വില്യുണ്ടെനിക്ക്,

അങ്ങെല്ലാം കാടല്ലോ ഇങ്ങെല്ലാം മുള്ള്

എങ്ങനെ അടിയന്‍ വഴിതിരിയേണ്ടൂ?

ഒക്കത്ത് കുഞുണ്ട് തലയിലെ കള്ള്

എങ്ങനാ അടിയന്‍ വഴിതിരിയേണ്ടൂ?

അക്കരയുണ്ടൊരു തോണികടപ്പാന്‍

ആളുമണിയായിക്കടക്കും കടവ്

ഇക്കരവന്നിട്ടണയുമാത്തോണി

അപ്പോഴേ കൂടക്കടക്കയ്യും വേണം

തക്കമറിഞ്ഞു കടന്നുകൊണ്ടാല്‍

താനേ കടക്കാം കടവുകളെല്ലാം

ആറും കടന്നിട്ടക്കരച്ചെന്നാല്‍

ആനന്ദമുള്ളോനെ കാണാന്‍ പോലന്നേ....

നാന്‍ തന്ന തോണി കടന്നില്ലേ നിങ്കള്

തോണിക്കകത്ത് നീര്‍ കണ്ടില്ലെ ചൊവ്വറ്?

നാന്‍ തന്ന തേങ്ങ്യുടച്ചില്ലേ നിങ്കള്?

തേങ്ങ്കകത്ത് നീര്‍ കണ്ടില്ലേ ചൊവ്വറ്?

നാങ്കളെ കുപ്പയില്‍ നട്ടൊരു വാഴ-

പ്പഴമല്ലേ നിങ്കളെ തേവന് പൂജ?

നാങ്കളെ കുപ്പയില്‍ നട്ടൊരു തൃത്താ-

പ്പോവല്ലോ നിങ്കടെ തേവന്ന് മാല

പൂക്കൊണ്ട് മാലതൊടുക്ക്വല്ലോനുങ്കള്

പൊല്‍കൊണ്ട് മാല്‍ തൊടുക്ക്വല്ലോ നാങ്കള്‍

ചന്ദനം ചാര്‍ത്തി നടക്ക്വല്ലോനുങ്കള്‍

ചേറുമണിഞ്ഞ് നടക്കുമീ നാങ്കള്‍

വീരളിചുറ്റി നടക്ക്വല്ലോനുങ്കള്‍

മഞ്ചട്ടി ചുറ്റി നടക്കുമേ നാങ്കള്‍

വാളും പലിശയും എടുക്ക്വല്ലേനുങ്കള്‍

മാടിയും കത്തിയും എടുക്കുമേ നാങ്കള്‍

പൂക്കുട ചൂടി നടക്ക്വല്ലെനുങ്കള്‍

പൂത്താലി ചൂടി നടക്ക്വല്ലോ നാങ്കള്‍

ആനപ്പുറങ്കേറി നിങ്കള്‍ വരുമ്പോ

പോത്തിന്‍ പുറങ്കേറി നാങ്കള്‍ വരുമേ!!

നിങ്കള്‍ പലര്‍കൂടി നാട് പഴുക്കും

നാങ്കല്‍ പലര്‍കൂടി തോട് പഴുക്കും

നിങ്കല്‍ പലര്‍കൂടി മോലോത്ത് പൊമ്പോ

നാങ്കള്‍ പലര്‍കൂടി മന്നത്ത് പോകും

“നീങ്കളും നാങ്കളും ഒക്കും!" :

നീങ്കളെക്കൊത്ത്യാലും ചോരല്ലേ ചൊവ്വറ്?

നാങ്കളെക്കൊത്ത്യാലും ചോരല്ലേ ചൊവ്വറ്?

പിന്നെന്തെ ചൊവ്വറ് കുലം പിശക്ന്ന്?

തീണ്ടിക്കൊണ്ടല്ലേ കുലം പിശക്ന്ന്!

എല്ലെല്ലക്കൊയില്‍ കുല പിശകൂലം

മാപ്പിളക്കൊയില്‍ കുലം പിശകഏണ്ട്!

പെരിയോന്റെ കോയീക്കലെല്ലാരും ചെന്നാല്‍

അവിടെക്ക് നീങ്കളും നാങ്കളുമൊക്കും!

...........................................................

.............................................................

(ഫോട്ടോ കടപ്പാട്: www.kannurtourism.org)

മുച്ചിലോട്ടു ഭഗവതി

2007-02-22T02:27:00.000-08:00

അറിവുകൊണ്ട് വിജയം നേടിയപ്പോള്‍ അപവാദ പ്രചരണം നടത്തി സമൂഹം ഭ്രഷ്ട് കല്‍പ്പിച്ചതിനാല്‍, അപമാനഭാരത്താല്‍ അഗ്നിയില്‍ ജീവന്‍ ഹോമിച്ച വിദ്യാസമ്പന്നയായ ബ്രഹ്മണകന്യകയാണ് മുച്ചിലോട്ടു ഭഗവതി.

പെരിഞ്ചെല്ലൂര്‍ (ഇപ്പോഴത്തെ തളിപ്പറമ്പ്) ഗ്രാമത്തിലെ ഒരു ബ്രാഹ്മണകന്യക എഴുത്തു പള്ളിക്കൂടത്തില്‍ വച്ച് നടന്ന വാദ പ്രതിവാദത്തില്‍ പ്രഗത്ഭരെ തോല്‍പ്പിച്ചു. രസങ്ങളില്‍ വെച്ച് കാമരസവും, വേദനകളില്‍ പ്രസവവേദനയുമാണ് അനുഭവങ്ങളില്‍ മികച്ചതെന്നു സമര്‍ത്ഥിച്ച അവള്‍‍ക്കെതിരെ അപവാദപ്രചരണം നടത്തി ഭ്രഷ്ട് കല്‍പ്പിച്ച് പുറത്താക്കി. അപമാനിതയായ ആ കന്യക വടക്കോട്ട് നടന്ന് കരിവെള്ളൂരെത്തി കരിവെള്ളൂരപ്പനെയും, ദയരമംഗലത്ത് ഭഗവതിയെയും കണ്ട് വണങ്ങി തന്റെ സങ്കടം അറിയിച്ച് മനമുരികി പ്രാര്‍ത്ഥിച്ചു. തന്റെ നിരപരാധിത്വം തെളിയിക്കാന്‍ സ്വയം അഗ്നികുണ്ട്മൊരുക്കി ആത്മത്യാഗം ചെയ്യാന്‍ തീരുമാനിച്ചു. എണ്ണയുമായി ആ വഴി പോയ മുച്ചിലോടനോട് (വാണിയ സമുദായത്തില്‍ പെട്ടയാള്‍) തീയിലേക്ക് എണ്ണ ഒഴിക്കുവാന്‍ ആവശ്യപ്പെട്ടു. ആവളുടെ വാക്കുകള്‍ കേട്ട് അമ്പരന്ന മുച്ചിലോടന്‍ എണ്ണ മുഴുവന്‍ തീയിലേക്കൊഴിച്ചു. അങ്ങിനെ അഗ്നിപ്രവേശം ചെയ്ത് ആ സതീരത്നം തന്റെ ആത്മപരിശുദ്ധി തെളിയിച്ചു. ഒഴിഞ്ഞ പാത്രവുമായി വീട്ടില്‍ വന്ന മുച്ചിലോടന്‍ കണ്ടത് പാത്രം നിറയെ എണ്ണ നിറഞ്ഞതായാണ്. ആത്മാഹുതി ചെയ്ത കന്യക് കരിവെള്ളൂരപ്പന്റെയും, ദയരമംഗലത്തു ഭഗവതിയുടെയും അനുഗ്രഹത്താല്‍ ഭഗവതിയായി മാറിയെന്നും മുച്ചിലോടന് മനസ്സിലാവുകയും തന്റെ കുലപരദേവയായി കണ്ട് ആരാധിക്കുവാന്‍ തുടങ്ങുകയും ചെയ്തു. അങ്ങിനെയാണ് ബ്രഹ്മണ കന്യക മുച്ചിലോട്ടു ഭഗവതിയായി മാറിയത്. വിവിധ സ്ഥലങ്ങളില്‍ മുച്ചിലോട്ടു ഭഗവതിയുടെ സാന്നിദ്ധ്യമുണ്ടാവുകയും, തന്റെ ശക്തി തെളിയിക്കുകയും ചെയ്യുകയുണ്ടായത്രെ.

വാണിയ സമുദായക്കാര്‍ തങ്ങളുടെ കുലദേവതയായി ആരാധിക്കുന്നത് മുച്ചിലോട്ട് ഭഗവതിയെയാണ്. കാസര്‍ഗോഡ് മുതല്‍ പാനൂര്‍ വരെ 18 പ്രധാന മുച്ചിലോട്ടുകാവുകള്‍ ഉണ്ട്. “ആദി മുച്ചിലോട്ട്” എന്ന നിലയില്‍ ഏറ്റവും പ്രധാന്യം കരിവെള്ളൂര്‍ മുച്ചിലോട്ടിനാണ്. മുച്ചിലോട്ടുകാവുകളിലെ കളിയാട്ട സമയത്ത് അന്നദാനത്തിന് വളരെ പ്രാധാന്യമുണ്ട്.

മുച്ചിലോട്ടു ഭഗവതിയെ മുച്ചിലോട്ടച്ചിയെന്നും, മുച്ചിലോട്ടമ്മയെന്നും, മുച്ചിലോട്ട് പോതിയെന്നും വിളിക്കാറുണ്ട്.

(Photo courtesy: NIC, Kannur)

കടവാങ്കോട്ട് മാക്കം (മാക്കപോതി)

2007-02-04T23:21:00.000-08:00

നാത്തൂന്മാരുടെ അപവാദ പ്രചരണം കൊണ്ട് സ്വന്തം സഹോദരന്മാരാല്‍ ജീവന്‍ നഷ്ടപ്പെട്ട ഒരു നായര്‍സ്ത്രീ തെയ്യമായി മാറിയ കഥയാണ് കടവാങ്കോട്ട് (കടങ്കോട്ട്) മാക്കം അഥവ മാക്കപ്പോതി.

പയ്യന്നൂരിനടുത്തുള്ള കുഞ്ഞിമംഗലത്തെ കടവാങ്കോട്ട് തറവാട്ടിലെ ഉണിച്ചെറിയമ്മക്ക് പന്ത്രണ്ട് ആണ്മക്കളായിരുന്നു. മരുമക്കത്തായ സമ്പ്രദായ പ്രകാരം തറവാട് വാഴാന്‍ പെണ്‍സന്തതി ഇല്ലാത്തതിനാല്‍ ദു:ഖിതയായ അവര്‍ 40 ദിവസം വ്രതമിരുന്നു. തുടര്‍ന്ന് ദൈവനുഗ്രഹത്താല്‍ ഒരു പെണ്‍കുഞ്ഞ് ഉണ്ടായി.

“പത്തുമാസം പത്താം ദിവസം പത്ത് നാഴിക ചെല്ലുമ്പോള്‍
നൊന്ത് വിളിച്ച് പൊന്മകളെ പ്രസവം ചെയ്തു
അന്തിവെളിച്ചം ആദിത്യന്റെ ചെങ്കതിര്‍ പോലെ
പത്തര മാറ്റുള്ളൊരു തങ്കം പോലെ”

പന്ത്രണ്ട് ആങ്ങളമാര്‍ക്കും അരുമയായ അനുജത്തിക്ക് കുഞ്ഞിമാക്കം എന്നാണ് പേരു വിളിച്ചത്. യഥാകാലം അവളുടെ വിദ്യാഭ്യാസം നടന്നു. വയസ്സ് 12 തികഞ്ഞപ്പോള്‍ നാട്ടുനടപ്പനുസരിച്ച് മച്ചുനന്‍ കുട്ടി നമ്പര്‍ കുഞ്ഞിമാക്കത്തെ കല്ല്യാണം കഴിച്ചു. ആ ദമ്പതിമാര്‍ക്ക് ചന്തുവെന്നും, ചീരുവെന്നും പേരായി രണ്ട് മക്കള്‍ ജനിച്ചു.

മരുമക്കത്തായ സമ്പ്രദായം അനുസരിച്ച് മാക്കം കടവാങ്കോ‍ട്ട് തറവാട്ടില്‍ തന്നെയാണ് താമസിച്ചിരുന്നത്. മാക്കത്തിന്റെ ആങ്ങളമാര്‍ കോലത്തിരിയുടെ പടനായകന്മാരായിരുന്നു. നേരിയോട്ട് സ്വരൂപവും കോലത്തിരിയും തമ്മില്‍ പടകുറിച്ചതിനാല്‍ പടനയിക്കുവാന്‍ മാക്കത്തിന്റെ സഹോദരന്മാര്‍ പോകേണ്ടതായി വന്നു. മാക്കം അവരെ വിലക്കി നോക്കി. തമ്പുരാന്റെ കല്‍പ്പനയായതിനാല്‍ പടക്കു പോകാതിരിക്കാന്‍ പറ്റില്ലല്ലോ.

സഹോദരന്മാര്‍ക്ക് മാക്കം ജീവനായിരുന്നുവെങ്കിലും നാത്തൂന്മാര്‍ക്ക് മാക്കത്തെ ഇഷ്ടമല്ലായിരുന്നു. നാത്തൂന്മര്‍ കുഞ്ഞിമാക്കത്തെ ചതിക്കുവാന്‍ സന്ദര്‍ഭം നോക്കിയിരിക്കുകയായിരുന്നു. അവര്‍ കൂടിയാലോചിച്ച് ഒരു ഗൂഢപദ്ധതിയുണ്ടാക്കി. വൈകുന്നേരം സ്ഥിരമായി തറവാട്ടില്‍ എണ്ണ കൊണ്ടു വരാറുള്ള വാണിയനെമ്മന്‍ എണ്ണ കൊണ്ടുവരുമ്പോള്‍ തങ്ങളാരും അവിടെ ഉണ്ടാകരുതെന്ന് അവര്‍ തീരുമാനിച്ചു. വാണിയനെമ്മന്‍ എണ്ണയുമായി വന്നപ്പോള്‍ അതെടുത്തു വയ്ക്കാന്‍ ആരും വന്നില്ല. മാക്കം ഋതുവായി അടുക്കളമൂലയില്‍ ഇരിക്കുകയായിരുന്നു. “എനിക്കു തൊട്ടുകൂടാ, എണ്ണ അകത്തേക്കു വെച്ചേക്കൂ” മാക്കം വിളിച്ചു പറഞ്ഞു. അവന്‍ എണ്ണ അകത്തുവച്ച് പുറത്തിറങ്ങുമ്പോഴേക്കും നാത്തൂന്മാരും വന്നു. അവര്‍ അങ്ങോട്ടുമിങ്ങോട്ടും പരിഹാസരൂപത്തില്‍ അര്‍ത്ഥം വച്ചു നോക്കി.

പട ജയിച്ചു വന്ന ഭര്‍ത്താക്കന്മാരെ അവര്‍ വഴിക്കു വച്ച് കണ്ട് എതിരേറ്റത് മാക്കത്തെക്കുറിച്ച് അപവാദം പറഞ്ഞുകൊണ്ടായിരുന്നു. അവര്‍ അതുകേട്ട് വിശ്വസിക്കുകയും ചെയ്തു. പേരു ദോഷം വരുത്തിയ സഹോദരിയെ കൊല്ലാന്‍ അവര്‍ തീരുമാനിച്ചു. പട ജയിച്ചു വന്ന സഹോദരന്മാരെ മാക്കം തറവാട്ടിലമ്മയെന്ന നിലയില്‍ വിളക്കുവെച്ച് എതിരേല്‍ക്കാന്‍ ചെന്നപ്പോള്‍ സഹോദര്‍ന്മാര്‍ അവളെ വിലക്കി. ഇതില്‍ നിന്നും സംഗതിയുടെ ഗൌരവം മാക്കത്തിനു മനസ്സിലായി.

കോട്ടയം കാവിലെ പൂരവിളക്ക് കാണാനെന്ന വ്യാജേന അവര്‍ മാക്കത്തെയും രണ്ട് മക്കളെയും കൂട്ടി പുറപ്പെടാന്‍ ആവശ്യപ്പെട്ടു. ഇതിലെന്തോ ദുരുദ്ദേശമുണ്ടെന്ന് മനസ്സിലായ മാക്കം കുളിച്ച് കുടുംബ ദേവതയുടെ സ്ഥാനമായ പടിഞ്ഞാറ്റയകം തുറന്ന് വിളക്കു വച്ച് സത്യം മാലോകര്‍ക്ക് വെളിപ്പെടണമെന്ന് പ്രാര്‍ത്ഥിച്ചു യാത്ര പുറപ്പെട്ടു. വഴിക്കുവച്ച് മാടായിക്കാവിലമ്മ, അഗ്രശാല മാതാവായ ചെറുകുന്നിലമ്മ, കളരിവാതുക്കല ഭഗവതി, കടലായി കൃഷ്ണന്‍ തുടങ്ങി എല്ലാ ദൈവങ്ങളെയും, പരദേവതകളെയും പ്രാര്‍ത്ഥിച്ച് തന്റെ നിരപരാധിത്വം തെളിയിക്കണെമെന്ന് സത്യം ചെയ്തു.

നടന്ന് നടന്ന് ചാലയിലെത്തിയപ്പോള്‍ കുട്ടികള്‍ക്ക് ദാഹിച്ചു. സഹോദര്‍ന്മാരുടെ അനുവാദത്തോടെ ചാല പുതിയ വീട്ടില്‍ കയറി വെള്ളം ചോദിച്ചു. അവിടെ നിന്ന് കാച്ചി തണുത്ത പാലാണ് നല്‍കിയത്. “ഇതെന്റെ അവസാനത്തെ പാല്‍കുടിക്കലാണെന്ന്“ പറഞ്ഞ് മാക്കം തന്റെ കഴുത്തില്‍ കിടന്ന സ്വര്‍ണ്ണാഭരണം ആ വീട്ടമ്മയ്ക്ക് നല്‍കി.

വീണ്ടും നടന്ന് മമ്പറം കടവ് കടന്ന് കിഴക്കോട്ട് യാത്രയായി. യാത്ര തുടര്‍ന്നപ്പോള്‍ കുട്ടികള്‍ക്ക് വീണ്ടും ദാഹിച്ചു. ദാഹം തീര്‍ക്കുന്നതിനായി അയ്യങ്കരപ്പള്ളി (തച്ചങ്കരപള്ളി) യരികെയുള്ള കിണറ്റിനടുത്തെത്തി കുട്ടികള്‍ക്ക് വെള്ളമെടുത്തു കൊടുത്തു. “നട്ടുച്ചക്ക് നക്ഷത്രമുദിച്ചത് കണ്ട്വോ മാക്കേ” എന്ന് സഹോദരന്മാര്‍ ചോദിച്ചു. അവള്‍ തലയുയര്‍ത്തി നോക്കിയ തഞ്ചം നോക്കി ചുരികയൂരി മാക്കത്തിന്റെയും മക്കളായ ചാത്തുവിന്റെയും, ചീരുവിന്റെയും തലയറുത്ത് ആ കിണറ്റില്‍ തള്ളി. ആടുത്തുള്ള കാട്ടില്‍ നിന്നും മുളവെട്ടിക്കൊണ്ടിരുന്ന മാവിലന്‍ ഈ ക്രൂരകൃത്യം കണ്ടു നിലവിളിച്ചു. അവര്‍ അവനെയും തങ്ങളുടെ വാളിന്നിരയാക്കി. താമസിയാതെ സഹോദരന്മാര്‍ തമ്മില്‍ കലഹിച്ച് തന്നത്താന്‍ മറന്ന് വാള്‍വീശി കൊത്തിമുറിച്ച് മരിച്ചു. ഏഷണി പറഞ്ഞ് നടന്ന നാത്തൂന്മാര്‍ ചിത്തഭ്രമം വന്നു മരണമടഞ്ഞു.

മാക്കത്തിന്റെ പ്രാര്‍ത്ഥനപോലെ കടവാങ്കോട്ട് തറവാട്ടിനു തീപിടിച്ചു. കുടും‌ബദേവതയായ വീര ചാമുണ്ഡിയുടെ കൊട്ടിലകം മാത്രം കത്തി നശിച്ചില്ല. ഒടുവില്‍ മാലോകര്‍ക്ക് മാക്കത്തിന്റെ നിരപരാധിത്വം വെളിപ്പെട്ടു. അവര്‍ മാക്കത്തെ ദേവതയായികണ്ട് കോലം കല്‍പ്പിച്ച് കെട്ടിയാടിച്ചു. അങ്ങിനെ കെട്ടിയാടിച്ചപ്പോള്‍ മാക്കത്തിന്റെ കൂടെ കൊല്ലപ്പെട്ട മക്കളായ ചാത്തുവിനും, ചീരുവിനും, മാവിലനും കോലമുണ്ടായി. കരുണാരസ പ്രധാനമായ് ഈ ദു:ഖാന്ത കഥ കോലത്തു നാട്ടിലെ ജനങ്ങളെ ഒന്നടങ്കം ആകര്‍ഷിച്ച പുരാവൃത്തമാണ്. സന്താന ലബ്ധിക്കുവേണ്ടി മാക്കപ്പോതി കെട്ടിയാടിക്കാമെന്ന് പ്രാര്‍ത്ഥിക്കുക കോലത്തുനാട്ടിലെ പതിവാണ്.

(ഫോട്ടോ: മനോരമ)

കതിവനൂര്‍ വീരന്‍ - പുരാവൃത്തം ഭാഗം 2

2007-01-30T00:23:00.000-08:00

തന്റെ ഭാര്യ സ്വബോധത്തോടെയല്ല അപ്രകാരം പറഞ്ഞതെന്നും, ഇതെല്ലാം ദൈവത്തിന്റെ കളിയാണെന്നും വിശ്വസിച്ച്‌ മന്ദപ്പന്‍ കച്ചകെട്ടി ആയുധവുമായി പടക്കളത്തിലേക്ക്‌ കുതിച്ചു.

ആയുധവുമായി പടക്കളത്തിലേക്ക്‌ വന്ന മന്ദപ്പനെകണ്ട്‌ കുടകര്‍ ഭയക്കുകയും അങ്കത്തില്‍ കുടകരുടെ പട പരാജയപ്പെടുകയും ചെയ്തു. പട തീര്‍ന്ന് പടക്കളത്തില്‍ നില്‍ക്കുമ്പോഴാണ്‌ തന്റെ പീഠമോതിരവും ചെറുവിരലും നഷ്ടപ്പെട്ടുവെന്നത്‌ മന്ദപ്പന്‌ മനസ്സിലായത്‌. ഇങ്ങനെ അംഗഭംഗം വന്ന് നിലയില്‍ വീട്ടിലെത്തിയാല്‍ ചെമ്മരത്തിയുടെ നിന്ദക്കു പാത്രീഭവിക്കുമെന്നതിനാല്‍ മരിക്കുന്നതാണിനി നല്ലതെന്ന് അവന്‍ കരുതി. പരജയപ്പെട്ട കുടകരുടെ പട കാട്ടില്‍ ഒളിച്ചിരിപ്പുണ്ടെന്നും, ആ കള്ളപ്പടയുടെ മുന്നില്‍ ചെന്ന് പെടനാണ്‌ ഉദ്ദേശിക്കുന്നതെന്നും ചങ്ങാതിമാരെ അറിയിച്ചു. മനപ്പൂര്‍വ്വം ആയുധമെടുക്കതെ ചങ്ങാതിമാരുടെ തടസ്സവാദങ്ങള്‍ മാനിക്കതെ മന്ദപ്പന്‍ യാത്രയായി.
പ്രതീക്ഷിച്ചതുപോലെ കുടകരുടെ കള്ളപ്പട മാരിപോലെ അമ്പെയ്ത്‌ മന്ദപ്പനെ തുണ്ടം തുണ്ടമാക്കി.മന്ദപ്പന്റെ അന്ത്യത്തെക്കുറിച്ചറിഞ്ഞ അമ്മാവനും ചെമ്മരത്തിയും പടക്കളത്തിലെത്തി തുണ്ടം തുണ്ടമായ ശരീര ഭാഗങ്ങള്‍ ചേര്‍ത്തു വച്ചു ചിതയൊരുക്കി.

മന്ദപ്പനെ ദഹിപ്പിച്ചുകൊണ്ടിരിക്കെ "ഉച്ചിയെലെന്തൊരു വെള്ളിനക്ഷത്രം കാണുന്നു"വെന്ന് ചെമ്മരത്തി ചോദിക്കുകയും, എല്ലാവരും ആകാശത്ത്‌ നോക്കുന്നനേരത്ത്‌ ആ പതിവ്രതാരത്നം ചിതയില്‍ച്ചാടി (ഉടന്തടി) മരിക്കുകയും ചെയ്തു. എല്ലാം കഴിഞ്ഞ്‌ തിരിച്ചു വന്താര്‍മുടിപ്പുഴയില്‍ കുളിക്കുമ്പോള്‍ മന്ദപ്പനും ചെമ്മരത്തിയും മേലെക്കടവില്‍ നിന്ന് കുളിക്കുന്നതായി അമ്മാവന്റെ മകന്‍ അണ്ണൂക്കന്‍ കണ്ട്‌ ഓടിച്ചെന്നു നോക്കിയപ്പോള്‍ കല്ലും പുല്ലും ഭൂമിയും നനഞ്ഞതായി കണ്ടതല്ലാതെ അവരെ കാണന്‍ കഴിഞ്ഞില്ല.തിരിച്ചു വീട്ടിലെത്തിയപ്പോള്‍ തേന്‍ കദളിവാഴ വിറക്കുന്നു. അതിന്മേലായിരുന്നു പീഠമോതിരമണിഞ്ഞ ചെറുവിരല്‍ ചെന്നു വീണിരുന്നത്‌. അണ്ണൂക്കന്‍ അതില്‍ തൊട്ടപ്പോള്‍ അവന്റെമേല്‍ മന്ദപ്പന്റെ ചൈതന്യം ആവേശിച്ച്‌ വെളിപ്പെട്ടു.

"മരിച്ചിനെന്നു ഭാവിക്കേണ്ട നിങ്ങളെന്റെ നേരമ്മോമ
മരിച്ചിനെന്നിട്ട്‌ ഏഴും പതിമൂന്നും വേണ്ടെനിക്ക്‌
അകത്തൊരു അകപൂജ പുറത്തൊരു പെരുങ്കളിയാട്ടം
പാര്‍കോഴി മധുകലശം കട്ടിയപ്പം കരിങ്കലശം
പൊറത്ത്‌ ചങ്ങാതികള്‍ക്കും കൊടുത്താല്‍ മതി..."

എന്ന അരുളപ്പാടുണ്ടാകുകയും, തെയ്യം കെട്ടേണ്ട ആളിനെ നിശ്ചയിക്കുകയും, അണ്ണൂക്കന്‍ തന്നെ കോമരത്തിന്റെ സ്ഥാനം ഏറ്റെടുക്കുകയും ചെയ്തു. തെയ്യം കെട്ടി പുറപ്പെട്ടപ്പോള്‍ അമ്മാവന്‍ അരിയെറിഞ്ഞ്‌ കതിവനൂര്‍ വീരാ എന്നു വിളിച്ചു. അങ്ങിനെയാണ്‌ മന്ദപ്പന്‍ കതിവനൂര്‍ വീരനായത്‌.

മണിക്കൂറുകളോളം നീണ്ടു നില്‍ക്കുന്ന കതിവനൂര്‍ വീരന്റെ തോറ്റം കരളലിയിക്കുന്ന ഗാനധാരയാണ്‌. വാഴപ്പോളകൊണ്ട്‌ തയ്യാറാക്കിയ തറയ്ക്കു ചുറ്റുമാണ്‌ കതിവനൂര്‍ വീരന്‍ തെയ്യം തന്റെ അഭ്യാസപ്രകടനങ്ങള്‍ കാഴ്ചവെക്കുക പതിവ്‌. ഈ തറ ചെമ്മരത്തിയാണെന്നാണ്‌ സങ്കല്‍പ്പം. സാധരണ കെട്ടിയാടിക്കുന്നതിനു പുറമെ നേര്‍ച്ചയായി ഉദ്ദിഷ്ട കാര്യ സിദ്ധിക്കും, ആപത്മോചനത്തിനുമായുള്ള വഴിപാടായും ഈ തെയ്യം കെട്ടിയാടിക്കാറുണ്ട്‌.

കതിവനൂര്‍ വീരന്‍ - പുരാവൃത്തം ഭാഗം 1

2007-01-26T01:22:00.000-08:00

ശ്രദ്ധേയമായ പുരാവൃത്തമുള്ള ഒരു തെയ്യമാണ്‌ കതിവനൂര്‍ വീരന്‍. വീര പരാക്രമിയായ മന്ദപ്പന്റെ അത്യന്തം സാഹസപൂര്‍ണ്ണവും, ദുരന്തപര്യവസായിയുമായ ജീവിത കഥയാണ്‌ കതിവനൂര്‍ വീരന്റേത്‌. കതിവനൂര്‍ വീരന്‍ കതുവനൂര്‍ വീരന്‍, കതിനൂര്‍ വീരന്‍ എന്നീ പേരുകളിലും ഈ തെയ്യം അറിയപ്പെടുന്നു.

തളിപ്പറമ്പിനടുത്തുള്ള മാങ്ങാട്ട്‌ ദേശത്ത്‌ (ഇപ്പോള്‍ കണ്ണൂര്‍ സര്‍വ്വകലാശാലയുടെ ആസ്ഥാനം സ്ഥിതി ചെയ്യുന്ന സ്ഥലം) പ്രശസ്തമായ ഒരു തീയ്യ കുടുംബത്തില്‍ കുമരച്ചന്റെയും, ചക്കിയുടെയും മകനായി മന്ദപ്പന്‍ ജനിച്ചു. അക്ഷര വിദ്യയും ആയുധ വിദ്യയും യഥാകാലം അഭ്യസിച്ച അവന്‍ "ഒറ്റയും, കുറിയും" എന്ന വിനോദം പ്രായമേറെ ആയിട്ടും ഉപേക്ഷിക്കാന്‍ തയ്യാറായില്ല. ചങ്ങാതിമാരൊത്ത്‌ കളിച്ചു നടക്കുകയല്ലാതെ യതൊരു വിധത്തിലുള്ള ജോലിയും അവന്‍ ചെയ്യാറില്ലായിരുന്നു. വിശക്കുമ്പോള്‍ ഭക്ഷണം കഴിക്കാന്‍ മാത്രം വരാറുള്ള മകന്റെ സ്വഭാവത്തില്‍ പിതാവ്‌ ദുഖിതനായിരുന്നു. ഒരു ദിവസം പണി ചെയ്യണമെന്ന പിതാവിന്റെ ഉപദേശമനുസരിക്കാതെ കളിക്കാന്‍ പോയതിനാല്‍ മേലില്‍ മന്ദപ്പന്‌ ചോറു നല്‍കരുതെന്ന് അമ്മയെ വിലക്കി. കളി കഴിഞ്ഞ്‌ ഉച്ചക്കു വീട്ടിലെത്തി ഭക്ഷണത്തിന്‌ ചെന്നിരുന്നപ്പോഴാണ്‌ പിതാവ്‌ ഭക്ഷണം വിലക്കിയ വിവരം മന്ദപ്പന്‍ അറിഞ്ഞത്‌. മകന്റെ വാക്കുകേട്ട്‌ മനസ്സലിഞ്ഞ അമ്മ ചോറുവിളമ്പിയെങ്കിലും, കുമരച്ചന്‍ അതു കണ്ടു പിടിച്ചു. രോഷകുലനായ പിതാവ്‌ മന്ദപ്പന്റെ കളി ആയുധമായ വില്ലെടുത്ത്‌ ചവിട്ടിപ്പൊളിച്ചു ചാടി (എറിഞ്ഞു) കളഞ്ഞു. ആയുധം നശിപ്പിച്ചത്‌ മന്ദപ്പന്‌ സഹിക്കാനായില്ല. ഇനി ആ വീട്ടില്‍ ഇരിക്കില്ലെന്ന് പ്രതിജ്ഞയെടുത്ത്‌ വീടു വിട്ടിറങ്ങിയ മന്ദപ്പന്‍ കൂട്ടുകാരുടെ കൂടെ കുടകു മലയില്‍ കച്ചവടത്തിനു പോകുവാന്‍ തീരുമാനിച്ചു.

മാതാപിതാക്കളോട്‌ പിണങ്ങി വന്ന മന്ദപ്പനെ കൂട്ടുവാന്‍ കൂട്ടുകാര്‍ക്കു താല്‍പ്പര്യമില്ലാത്തതിനാല്‍, യാത്ര പുറപ്പെടുന്നതിനു മുമ്പ്‌ ഉല്ലസിക്കുവാനെന്ന മട്ടില്‍ മദ്യം കുടിപ്പിച്ച്‌ ഉറക്കിക്കിടത്തി. മത്ത്‌ വിട്ടുണര്‍ന്നപ്പോള്‍ ചങ്ങാതിമാര്‍ ചതിച്ചെന്നു മനസ്സിലാക്കിയ മന്ദപ്പന്‍ രണ്ടും കല്‍പ്പിച്ച്‌ പരദേവതകളെ മനസ്സില്‍ ധ്യാനിച്ച്‌ മാറപ്പെടുത്ത്‌ ഏഴിനും മീത്തലേക്ക്‌ (കുടകുമല) യാത്ര തിരിച്ച്‌ കതിവനൂരിലുള്ള അമ്മാവന്റെ വീട്ടിലെത്തിച്ചേരുകയും അമ്മാവനും അമ്മായിയും അവനെ സ്വീകരിക്കുകയും ചെയ്തു. അമ്മവന്‍ സ്വന്തം സ്ഥലത്തിന്റെ പകുതി മന്ദപ്പനു നല്‍കുകയും അവന്‍ ആ സ്ഥലത്ത്‌ അസൂയവഹമായ രീതിയില്‍ വിളവെടുക്കുകയും ചെയ്തു. കൂടുതല്‍ ധനം സമ്പാദിക്കണമെന്ന അമ്മായിയുടെ നിര്‍ദ്ദേശപ്രകാരം എള്ള്‌ വാങ്ങി ആട്ടി എണ്ണയെടുത്ത്‌ കുടകുമലകളിലെല്ലാം വിറ്റ്‌ ധാരളം പണവും സമ്പാദിച്ചു. മന്ദപ്പന്റെ ഉയര്‍ച്ചയില്‍ അസൂയാലുക്കളായ മുത്താര്‍മുടി കുടകര്‍ പടയൊരുക്കം നടത്തുന്നതിനാല്‍ സുഹൃത്തിക്കളുടെ ഉപദേശപ്രകാരം മന്ദപ്പന്‍ ആയുധങ്ങള്‍ ശേഖരിച്ചു വച്ചു.

ഒരു ദിവസം വേളങ്കോട്ട്‌ പുഴയരികിലൂടെ യാത്ര ചെയ്യുമ്പോള്‍ നീരാടുന്ന സുന്ദരിയായ ചെമ്മരത്തിയെ കാണുകയും ഇഷ്ടപ്പെടുകയും ചെയ്തു. അമ്മാവന്‍ എതിര്‍ത്തെങ്കിലും മന്ദപ്പന്‍ ചെമ്മരത്തിയെ വിവാഹം ചെയ്തു. തുടര്‍ന്നു ഭാര്യാഗൃഹത്തില്‍ താമസമാക്കിയ മന്ദപ്പന്‍ എണ്ണ വില്‍പ്പന തുടര്‍ന്നു. ഒരു ദിവസം എണ്ണ വിറ്റ പണവും കൊണ്ട്‌ ഇരുട്ടുന്നതിനു മുമ്പെ വീട്ടിലെത്താന്‍ സാധിക്കാത്തതിനാല്‍ മന്ദപ്പന്‌ കുടകരുടെ വഴിയമ്പലത്തില്‍ തങ്ങേണ്ടി വന്നു. പിറ്റേന്ന് വീട്ടിലെത്തിയ മന്ദപ്പനെ ചെമ്മരത്തി ബഹുമാനിച്ചില്ലെന്നു മാത്രമല്ല നല്‍കിയ ചോറില്‍ കല്ലും, തലനാരും (മുടി) കാണുകയും ചെയ്തു. ഊണ് കഴിക്കുന്നതിനിടെ കുടകരുടെ പടവിളി കേട്ടതിനാല്‍ ഊണുകഴിക്കാതെ പടയ്ക്കായി പുറപ്പെട്ടപ്പോള്‍ ദുശ്ശകുനങ്ങള്‍ കാണുകയും ചെയ്തു. പടയ്ക്കു പുറപ്പെട്ട മന്ദപ്പനെ തുണ്ടം തുണ്ടമായി പോകട്ടെയെന്നു ശപിച്ചുകൊണ്ടാണ്‌ ചെമ്മരത്തി യാത്രയാക്കിയത്‌. .............(തുടരും)

വിഷ്ണു മൂര്‍ത്തിയുടെ പുരാവൃത്തം

2007-01-12T03:33:00.000-08:00

കാസര്‍ഗോഡ്‌ ജില്ലയിലെ നീലേശ്വരത്തെ കുറുവാടന്‍ തറവാട്ടിലെ കാരണവരായ കുറുപ്പിന്റെ പശുക്കളെ മേക്കുന്നവനായിരുന്നു കണ്ണന്‍. കണ്ണന്‍ ഒരു ദിവസം മാവിന്‍ കൊമ്പിലിരുന്നു മാങ്ങ തിന്നുമ്പോള്‍ അതു വഴി പോയ കുറുപ്പിന്റെ അനന്തിരവളുടെ ദേഹത്ത്‌ മാങ്ങയുടെ അണ്ടി വീണുപോയി. കുപിതയായ അനന്തരവള്‍ അമ്മാവനോട്‌ പരാതി പറയുകയും, കോപിച്ച കുറുപ്പ്‌ കണ്ണനെ നാടു കടത്തുകയും ചെയ്തു.

മംഗലാപുരത്തെത്തിയ കണ്ണന്‍ വൃദ്ധയായ, കൃഷ്ണ ഭക്തയായ ഒരു തുളു സ്ത്രീയെ കാണുകയും അവര്‍ അഭയം നല്‍കുകയും ചെയ്തു. അവര്‍ കണ്ണന്‌ പുരാണ കഥകള്‍ (വിഷ്ണുവിന്റെയും, കൃഷ്ണന്റെയും) പറഞ്ഞു കൊടുക്കുകയും ക്രമേണ അവന്‍ കൃഷ്ണ ഭക്തനാവുകയും ചെയ്തു. കുറെ കാലം കഴിഞ്ഞപ്പോള്‍ നാടിനെ കുറിച്ചുള്ള ഓര്‍മ്മകള്‍ കണ്ണനില്‍ ഉണരുകയും, വൃദ്ധയുടെ സമ്മതത്തോടെയല്ലാതെ നാട്ടിലേക്ക്‌ യാത്രതിരിക്കാന്‍ തീരുമാനിക്കുകയും ചെയ്തു. യാത്ര തിരിക്കുമ്പോള്‍ വൃദ്ധ ഒരു ചുരികയും കുടയും സമ്മാനിച്ച്‌ അനുഗ്രഹിച്ചു.കണ്ണന്‍ നീലേശ്വരത്ത്‌ എത്തി താമരക്കുളത്തില്‍ കുളിക്കുന്നുണ്ടെന്ന വിവരം അറിഞ്ഞ കുറുപ്പ്‌ ഉറുമിയുമായി അവിടെ എത്തി കണ്ണന്റെ തലയറുത്തു. താമരക്കുളം ഒരു ചോരക്കുളമായി മാറി.

പിന്നീട്‌ കുറുപ്പിന്റെ തറവാട്ടില്‍ ദുര്‍ന്നിമിത്തങ്ങള്‍ കണ്ടു തുടങ്ങി. നാടു നീളെ പകര്‍ച്ചവ്യാധി പടര്‍ന്നു, കന്നുകാലികള്‍ ചത്തൊടുങ്ങി. പേടിച്ചുപോയ കുറുപ്പ്‌ ദൈവജ്ഞനെകൊണ്ട്‌ പ്രശ്നം വെപ്പിച്ചു നോക്കി. കൃഷ്ണ ഭക്തനായ കണ്ണനെ വധിച്ചതില്‍ ദൈവകോപമുണ്ടെന്നും, ഉടന്‍ പരിഹരിച്ചില്ലെങ്കില്‍ മുച്ചൂടും മുടിയുമെന്നും വെളിപ്പെട്ടു. തുടര്‍ന്ന് ചെയ്തുപോയ അപരാധത്തിന്‌ മാപ്പായി കണ്ണന്‌ ഒരു കോലം കല്‍പ്പിച്ച്‌ കെട്ടി സമര്‍പ്പിക്കാമെന്ന് പ്രാര്‍ത്ഥിക്കുകയും, വീണ്ടും പ്രശ്നം വച്ചപ്പോള്‍ ദൈവം സംപ്രീതനായതായും തെളിയുകയും ചെയ്തു. അങ്ങിനെയാണ്‌ വിഷ്ണുമൂര്‍ത്തി തെയ്യം ഉണ്ടായതെന്നാണ്‌ വിശ്വസിക്കുന്നത്‌. ഈ കഥയിലെ കുറുപ്പിനെ ഹിരണ്യകശിപുവായും, കണ്ണനെ പ്രഹ്ലാദനായും ചിലര്‍ സങ്കല്‍പ്പിച്ചു വരുന്നുണ്ട്‌.

കോലത്ത്‌ നാട്‌

2007-01-09T23:55:00.000-08:00

കേരളത്തില്‍ അനുഷ്ഠാനമായി തെയ്യം കെട്ടിയാടിവരുന്നത് വടക്കെ മലബാര്‍ (കോലത്ത് നാട്) പ്രദേശത്താണ്. തെയ്യത്തെ കുറിച്ച് കൂടുതല്‍ അറിയുന്നതിനു മുമ്പ് കോലത്തു നാടിന്റെ ചരിത്രം അറിഞ്ഞിരിക്കുന്നത് വളരെ പ്രയോജനപ്രദമാണ്.

വടക്കു കാസര്‍കോട്‌ മുതല്‍ തെക്ക്‌ കോരപ്പുഴവരെയും കിഴക്ക്‌ കുടകു മല മുതല്‍ പടിഞ്ഞാറ്‌ അറബിക്കടല്‍ വരെയും വ്യാപ്തിയുണ്ടായിരുന്നു കോലത്ത്‌ നാട്ടിന്‌. മൂഷക രാജ്യം എന്നറിയപ്പെട്ടിരുന്ന ഈ പ്രദേശം 14ആം നൂറ്റാണ്ട്‌ മുതലാണത്രെ കോലത്ത്‌ നാടെന്നറിയപ്പെടാന്‍ തുടങ്ങിയത്‌. കോലത്തുനാട്ടിലെ രാജാക്കന്മാരാണ്‌ കോലത്തിരി. കോലത്ത്‌ നാട്ടില്‍ എണ്ണമറ്റ നാടന്‍ കലാരൂപങ്ങള്‍, നാടന്‍ പാട്ടുകള്‍, മതപരവും മാന്ത്രികവുമായ വിശ്വാസങ്ങള്‍, അനുഷ്ഠാനങ്ങള്‍, ആരാധന രീതികള്‍ എന്നിവ പലതും ഉണ്ടായിരുന്നു. അവയില്‍ പലതും ഇന്നും നിലനില്‍ക്കുന്നുവെന്നത്‌ ശ്രദ്ധേയമാണ്‌.

ഒരു പ്രത്യേക സ്ഥലത്തെ (ഗ്രാമത്തിലെ) പ്രദേശത്തെ തെയ്യം കെട്ടാനും, ആചാരങ്ങള്‍ അനുഷ്ഠിക്കാനും ജന്മാരിക്ക്‌ (അധികാരപ്പെട്ട ആള്‍) മാത്രമെ അധികാരമുള്ളൂ. ഈ അധികാരത്തെ ചെറുജന്മാവകാശം എന്നാണ്‌ പറയുന്നത്‌. ചില അനിവാര്യ സാഹചര്യങ്ങളില്‍ മാത്രമെ മറ്റു ദേശങ്ങളിലുള്ളവര്‍ തെയ്യം കെട്ടേണ്ടി വരുമ്പോള്‍ ജന്മാരിയുടെ സമ്മതം വാങ്ങി മാത്രമെ അത്തരത്തില്‍ പ്രവര്‍ത്തിക്കുവാന്‍ സാധിക്കുകയുള്ളൂ. അനുഷ്ഠാനങ്ങള്‍ നിര്‍വ്വഹിച്ചിരുന്ന വിവിധ ജാതിയില്‍പെട്ട വിദഗ്ധര്‍ക്കു കോലത്തിരി സ്ഥാനപ്പേരുകളും ബഹുമതികളും നല്‍കി വന്നിരുന്നു. തെയ്യം കെട്ടി പ്രഗത്ഭ്യം തെളിയിച്ച 'മലയന്‌' പണിക്കര്‍ എന്നും, 'വണ്ണാന്‌' പെരുവണ്ണാന്‍ എന്നുമാണ്‌ സ്ഥാനപ്പേരുകള്‍. മലയന്‍ തീച്ചാമുണ്ടി തെയ്യം കെട്ടി നൂറിലേറെ തവണ മേലേരി (തീക്കൂന)യില്‍ വീണും,വണ്ണാന്‍ തീപ്പന്തങ്ങളേറ്റിയ പുതിയ ഭഗവതി തെയ്യം കെട്ടിയും തങ്ങളുടെ അഭ്യാസപാടവം തെളിയിച്ചാലുമാണ്‌ പട്ടും വളയും നല്‍കി അവരെ പണിക്കര്‍ എന്നും, പെരുവണ്ണാന്‍ എന്നും കോലത്തിരിയോ, അദ്ദേഹത്തിന്റെ പ്രതിനിധികളോ ആണ്‌ സ്ഥാനം നല്‍കി ആദരിക്കാറ്‌ പതിവ്‌.

കോലത്ത്‌ നാട്‌ ചരിത്രപരമായും, സാംസ്ക്കാരികപരമായും കേരളത്തിലെ മറ്റ്‌ ഭാഗങ്ങളില്‍ നിന്നും വേറിട്ട്‌ നില്‍ക്കുന്ന പ്രദേശമാണ്‌. കോലത്തിരിയുടെ കീഴില്‍ ഇവിടെ അനുഷ്ഠാനങ്ങളും നാടോടി കലകളും തഴച്ചു പടര്‍ന്നു. സമൂഹത്തിലെ വിവിധ ശ്രേണിയിലുള്ളവരെ പരസ്പരം ഏകോപിപ്പിക്കുന്നതിന്‌ പ്രദേശിക ഉത്സവങ്ങളും (കളിയാട്ടം ഉല്‍പ്പെടെ) ആഘോഷങ്ങളും പ്രധാന കണ്ണിയായി വര്‍ത്തിച്ചിരുന്നു.സമൂഹത്തിലെ ഏറ്റവും അടിത്തട്ടിലുള്ളവര്‍ (മലയര്‍, വണ്ണാന്‍ തുടങ്ങിയ ദളിതര്‍) ദൈവക്കോലങ്ങളായി ഏറ്റവും ഉന്നതരെയടക്കം അനുഗ്രഹിക്കുന്നത്‌ ഈ നാടിന്റെ സവിശേഷതയത്രെ. കാവുകള്‍, മുണ്ട്യ, സ്ഥാനം, കൂലോം തുടങ്ങിയ സ്ഥലങ്ങളിലും, കൊയ്ത്തിനു ശേഷമുള്ള വയലുകളിലുമാണ്‌ സാധാരണയായി തെയ്യം കെട്ടിയാടുന്നത്‌. ജാതി സമ്പ്രദായം കൊടികുത്തി വാണ സമയത്തു പോലും ഉയര്‍ന്ന ജാതിക്കാരുടെ വീടികളില്‍ കയറി ചെല്ലാനുള്ള അവകാശം മേല്‍ പറഞ്ഞവര്‍ക്കുണ്ടായിരുന്നു. ഇതുകൊണ്ടു തന്നെ വ്യത്യസ്ത സമുദായങ്ങള്‍ തമ്മിലുള്ള ഐക്യവും, രാഷ്ട്രീയ സാമൂഹിക ഘടനയില്‍ അവര്‍ക്കുണ്ടായ ക്രിയാത്മകമായ പങ്കാളിത്തവും അനുഷ്ഠാനപരമായ പദവിയും കോലത്തു നാടിന്റെ (വടക്കെ മലബാറിന്റെ) പ്രത്യേകതയാണെന്നതില്‍ സംശയമില്ല.

വിഷ്ണുമൂര്‍ത്തി

2007-01-01T22:06:00.000-08:00

വിഷ്ണുമൂര്‍ത്തിയെന്നും പരദേവത എന്നും അറിയപ്പെടുന്ന ഈ തെയ്യം മഹാവിഷ്ണുവിന്റെ നരസിംഹാവതാരമാണ്. തെയ്യം കെട്ടിയാടാറുള്ള മിക്ക കാവുകളിലും പള്ളിയറകളിലും വിഷ്ണുമൂര്‍ത്തി തെയ്യക്കോലമുണ്ടാകാറുണ്ട്. മലയ സമുദായക്കാരാണ് കൂടുതലായി വിഷ്ണുമൂര്‍ത്തി തെയ്യം കെട്ടാറുള്ളത്. രാത്രി തെയ്യത്തിന്റ് ഉല്പത്തിയെകുറിച്ചുള്ള തോറ്റം പാട്ടോടുകൂടിയുള്ള വെള്ളാട്ടവും പകല്‍ തെയ്യക്കോലവുമാണ് ഉണ്ടാകാറുള്ളത്.

ആമുഖം

2006-12-27T21:33:00.000-08:00

ഉത്തര മലബാറില്‍ കാണപ്പെടുന്ന ഒരു അനുഷ്ഠാന കലയാണ്‌ തെയ്യം. ദൈവം എന്ന പദത്തില്‍ നിന്നാണ്‌ തെയ്യത്തിന്റെ ഉത്പത്തി. ആര്യാധിനിവേശത്തിനു കീഴ്പെടാത്ത ദ്രാവിഡ പഴമയാണ്‌ തെയ്യങ്ങള്‍. പഴയങ്ങാടി പുഴയ്ക്കു വടക്കോട്ട്‌ 'കളിയാട്ടം' എന്നും പഴയങ്ങാടി മുതല്‍ വളപട്ടണം വരെ 'തെയ്യം' എന്നും വളപട്ടണം മുതല്‍ തെക്കോട്ട്‌ 'തിറയാട്ടം' എന്നും തെയ്യം അറിയപ്പെടുന്നു. നൃത്തം ചെയ്യുന്ന ദേവതമാരാണു തെയ്യങ്ങള്‍. തെയ്യത്തിന്റെ നര്‍ത്തനം തെയ്യാട്ടം എന്നും തെയ്യത്തിന്റെ വേഷത്തെ തെയ്യക്കോലം എന്നും പറയുന്നു. തെയ്യത്തിനായി പാടി വരുന്ന പാട്ടുകളെ] തോറ്റം പാട്ടുകള്‍ എന്നാണു പറയുക. തോറ്റം എന്നാല്‍ സ്ത്രോത്രം എന്നു തന്നെയാണു മനസ്സിലാക്കേണ്ടത്‌. തെയ്യത്തിനു മുമ്പായി വെള്ളാട്ടം എന്നൊരു അനുഷ്ഠാനം കൂടി കണ്ടു വരുന്നു. ഒരു തികഞ്ഞ അനുഷ്ഠാന കലയില്‍ വേണ്ട മന്ത്രാനുഷ്ഠാനം, തന്ത്രാനുഷ്ഠാനം, കര്‍മ്മാനുഷ്ഠാനം, വ്രതാനുഷ്ഠാനം എന്നിവയെല്ലാം തെയ്യത്തിനും ആവശ്യമാണ്‌. തെയ്യത്തിനു സമമായ ദക്ഷിണകേരള അനുഷ്ഠാനമാണു പടയണി.

തെയ്യങ്ങള്‍ കൊട്ടിയാടുന്നതിനെ കളിയാട്ടം എന്ന് വിളിക്കപ്പെടുന്നു. പല തെയ്യങ്ങള്‍ കെട്ടിയാടുന്ന മഹോത്സവമാണ് പെരുംകളിയാട്ടം. ദൈവങ്ങള്‍ മനുഷ്യരൂപത്തില്‍ അവതരിപ്പിക്കപ്പെടുന്ന ഈ അനുഷ്ഠാനകലയെക്കുറിച്ച് അറിയാനും അറിവുപകരാനുമാണ് ഈ ബ്ലോഗ്.

തെയ്യത്തെക്കുറിച്ചുള്ള അറിവുകളും ചിത്രങ്ങളും മറ്റ് അനുബന്ധവിഷയങ്ങളും ഈ ബ്ലോഗില്‍ ഇനി പങ്കുവയ്ക്കപ്പെടും. തെയ്യങ്ങളില്‍ താല്‍പ്പര്യമുള്ള ആര്‍ക്കും ഈ ബ്ലോഗില്‍ ചേരാം. തെയ്യങ്ങളെക്കുറിച്ച് എന്തെങ്കിലും നിങ്ങള്‍ക്ക് പങ്കുവെയ്ക്കാനുണ്ടെങ്കില്‍ ഈ ബ്ലോഗിന്റെ കോണ്ട്രിബ്യൂട്ടെര്‍സ് ലിസ്റ്റില്‍ ഉള്ള ആരെങ്കിലുമായി ബന്ധപ്പെടുക.

എല്ലാ സഹായ സഹകരണങ്ങളും പ്രതീക്ഷിച്ചുകൊണ്ട് ഞങ്ങള്‍ തുടങ്ങട്ടെ.